ଜଳବାୟୁ ପରିବର୍ତ୍ତନ ଜନିତ ପ୍ରଭାବ ହ୍ରାସ ପାଇଁ ଅଂଟା ଭିଡିଛନ୍ତି କେନ୍ଦ୍ରାପଡ଼ାର ୩୪ ବର୍ଷ ବୟସ୍କା ଦେବଯାନୀ ମଣ୍ଡଳ । ଦେବଯାନୀ ଆଖପାଖର ୩୦୦ ରୁ ଅଧିକ ଚାଷୀଙ୍କୁ ଜଳବାୟୁର ଜ୍ବାଳାରେ ଚାଷର କ୍ଷତି ଓ ଏହାର ମୁକାବିଲା ଦିଗରେ ପରାମର୍ଶ ଦେଇ ବିକଳ୍ପ କୃଷିର ବ୍ୟବସ୍ଥା କରି ପ୍ରସଂଶିତ ହୋଇଛନ୍ତି । ଉପକୂଳ ଓଡିଶା ବିଶେଷ କରି କେନ୍ଦ୍ରାପଡା ଜିଲ୍ଲାରେ ସାମୁଦ୍ରିକ ଝଡ଼ ବାତ୍ୟାର ପ୍ରଭାବ ଅଧିକ । ପ୍ରତିବର୍ଷ ବର୍ଷା ,ପବନ ଓ ଜଳ ଠୁଳ କାରଣରୁ ବ୍ୟାପକ କ୍ଷତିର ସମ୍ମୁଖୀନ ହୋଇଥାଏ କେନ୍ଦ୍ରାପଡା । ଚାଷର ଧାରା ଓ ଶସ୍ୟର ପ୍ରକାରରେ ପରିବର୍ତ୍ତନ ଅଣାଗଲେ ଚାଷ ଓ ଚାଷୀର କ୍ଷତିକୁ କମାଯାଇପାରିବ ବୋଲି ଜଳବାୟୁ ପରିବର୍ତ୍ତନ ପ୍ରଭାବ ଟାଳିବାକୁ କାମ କରୁଥିବା କୃଷି ବୈଜ୍ଞାନିକ କହିବା ପରେ ଦେବଯାନୀ ଏ ଦିଗରେ ପ୍ରୟାସ ଆରମ୍ଭ କରିଥିଲେ । ଦେବଯାନୀ ଭଳି ଜଳବାୟୁ ଯୋଦ୍ଧାଙ୍କୁ ସହାୟତା କରିବା ପାଇଁ ଆଗେଇ ଆସିଥିଲା ଆନ୍ତର୍ଜାତୀୟ ସଂସ୍ଥା ଯୁଏନଡିପି । ଆନ୍ତର୍ଜାତୀୟ ଏହି ସଂଗଠନର ସହଯୋଗରେ ଶ୍ରୀ ପଦ୍ଧତିରେ ଧାନ ଚାଷ କରି ଜଳ ପରିଚାଳନା ସହିତ ଅଧିକ ଉତ୍ପାଦନର ଲାଭ ମିଳିଲା । ବଢି ଶହଣୀ ,ମରୁଡି ସହଣୀ ଧାନ ଚାଷ ସାଙ୍ଗକୁ ଫସଲ ଚକ୍ରରେ ପରିବର୍ତ୍ତନକୁ ଦେବଯାନୀ ଗୁରୁତ୍ୱ ଦେଲେ । ଅକ୍ଟୋବର ମାସରେ ବାତ୍ୟା ଆସୁଥିବା ବେଳେ ତା ପୂର୍ବରୁ ସଅଳ କିସମର ଧାନ ଓ ପରିବା ଅମଳ ହେଲା । ଏହା ଚାଷୀ ମାନଙ୍କୁ ଆର୍ଥିକ ଦୁରବସ୍ଥାରୁ ଦେଇପାରିଲା ସୁରକ୍ଷା । ମହିଳା କୃଷକଙ୍କ ସାମୁହିକ ଉଦ୍ୟମ ବାତ୍ୟା ପ୍ରବଣ କେନ୍ଦ୍ରାପଡା ଜିଲ୍ଲାରେ ନିଆରା ଧାରା ସୃଷ୍ଟି କରିବାରେ ସକ୍ଷମ ହେଲା । ଦେବଯାନୀ କହନ୍ତି ଜଳବାୟୁ ପରିବର୍ତ୍ତନ ଜନିତ ପ୍ରଭାବକୁ ଦେଖି ସେ ଅନୁସାରେ ଚାଷ କ୍ଷେତରେ ପାଣି ,ଫସଲ ଓ ପରିଚାଳନା କରାଯିବା ବର୍ତ୍ତମାନ ସମୟ ପାଇଁ ଅପରିହାର୍ଯ୍ୟ ।