ସ୍ନେହା ,ରେଶମା ଓ ଅମ୍ରିତା । ବ୍ରହ୍ମପୁର ସହରର ଏହି ତିନି ଫାର୍ମାସୀ ଛାତ୍ରୀ କରିଛନ୍ତି ଅଭିନବ ପ୍ରୟାସ । ଋତୁଶ୍ରାବ ପରିଚାଳନାକୁ ନେଇ ବସ୍ତି ମହିଳାଙ୍କ ରହିଥିବା ଭୁଲ ଧାରଣାକୁ ଦୂର ପାଇଁ ଭିଡିଛନ୍ତି ଅଣ୍ଟା । ପ୍ରାକୃତିକ ସାଧନକୁ ବ୍ୟବହାର କରି ପରିବେଶ ଅନୁକୂଳ ସାନିଟାରୀ ପ୍ୟାଡ଼ ପ୍ରସ୍ତୁତି କରି ସମାଜ କଲ୍ୟାଣରେ ଦେଇଛନ୍ତି ଯୋଗଦାନ । ଗଂଜାମ ଜିଲ୍ଲା ବ୍ରହ୍ମପୁର ସହରର ଏକ ଘରୋଇ ଫର୍ମାସୀ କଲେଜରେ ପଢ଼ନ୍ତି ସ୍ନେହା ଗୌଡ଼ ,ଅମ୍ରିତା ସ୍ବାଇଁ ଓ ରେଶମାରାଣୀ ଶତପଥୀ । କ୍ୟାମ୍ପସ ଭିତରେ ସେମାନଙ୍କ ମଧ୍ୟରେ ଭଲ ବନ୍ଧୁତ୍ୱ ସହିତ କ୍ୟାମ୍ପସ ବାହାରେ ସେମାନେ ଜିତିଛନ୍ତି ଲୋକଙ୍କ ହୃଦୟ । ଏକ ସାମାଜିକ ସଂଗଠନ ସହିତ ଯୋଡି ହୋଇ ସ୍ୱାସ୍ଥ୍ୟ ,ଶିକ୍ଷା ,ପରିବେଶ ଓ ଲିଙ୍ଗଗତ ନ୍ୟାୟ ଦିଗରେ ସେମାନେ କାମ କରନ୍ତି । ଛୁଟି ଦିନରେ ମଲ ,ପାର୍କ ଓ ସିନେମା ଯିବା ପରିବର୍ତ୍ତେ ସେମାନେ ମହିଳା ଓ କିଶୋରୀଙ୍କ ସମସ୍ୟା ବୁଝନ୍ତି । ଏହାର ସମାଧାନ ଦିଗରେ ଦିଅନ୍ତି ନିଜସ୍ୱ ଅବଦାନ । ମାସିକ ଋତୁଶ୍ରାବ ସମୟରେ ବସ୍ତିର ମହିଳା ଓ କିଶୋରୀ ମାନେ ସ୍ୱାସ୍ଥ୍ୟକର ସାନିଟାରୀ ପ୍ୟାଡ଼ ବଦଳରେ ପୁରୁଣା କପଡା ବ୍ୟବହାର କରୁଥିବା ଏମାନଙ୍କ ନଜରକୁ ଆସେ । ଏହା ପ୍ରଜନନ ସ୍ୱାସ୍ଥ୍ୟକୁ ପ୍ରଭାବିତ କରୁଥିବାରୁ ସ୍ୱାସ୍ଥ୍ୟକର ପ୍ୟାଡ଼ ପାଇଁ ସେମାନେ ନିଜ ଉଦ୍ୟମରେ ଆରମ୍ଭ କରନ୍ତି ପ୍ୟାଡ଼ ତିଆରି ଓ ବାଣ୍ଟିବା ଉଦ୍ୟମ ।
ବସ୍ତି ମହିଳାଙ୍କ ଭରସା ଜିତିଛନ୍ତି ଏହି ତିନି ଡାକ୍ତରୀ ଛାତ୍ରୀ । ଋତୁଶ୍ରାବ ବିଷୟରେ କହିବାକୁ ସଂକୋଚ କରୁଥିବା କିଶୋରୀ ଏବେ ସେମାନଙ୍କ ସହ କରୁଛନ୍ତି ଖୋଲା ଆଲୋଚନା । ସ୍ୱାସ୍ଥ୍ୟକର ସାନିଟାରୀ ପ୍ୟାଡ଼ ପ୍ରସ୍ତୁତି ପାଇଁ ସେମାନେ ବାଛିଛନ୍ତି ପ୍ରକୃତିରୁ ମିଳୁଥିବା ସାଧନ । କଦଳୀ ଗଣ୍ଡିର ତନ୍ତୁକୁ ବ୍ୟବହାର କରି ତିଆରି କରୁଛନ୍ତି ଜୈବ ବିଘଟନ ସାନିଟାରୀ ପ୍ୟାଡ଼ । ଏହା ରସାୟନ ମୁକ୍ତ ଓ ପରିବେଶ ପାଇଁ ଅନୁକୂଳ । କଦଳୀଗଣ୍ଡିର ତନ୍ତୁ ସମେତ ଆଖୁଛେଦାରେ ମଧ୍ୟ ସାନିଟାରୀ ପ୍ୟାଡ଼ କରି ପ୍ରସଂଶା ସାଉଣ୍ଟିଛନ୍ତି ଏହି ତିନି ବିଦ୍ୟାର୍ଥୀ । ଏସବୁ କାମ ସେମାନେ ନିଜର ରୋଜଗାର ପାଇଁ ନୁହଁ ବରଂ ଜନକଲ୍ୟାଣ ପାଇଁ କରୁଥିବା କହନ୍ତି । ଆଗକୁ ସରକାରୀ ସହଯୋଗ ରହିଲେ ଅଧିକ ଲୋକଙ୍କ ନିକଟରେ ପହଂଚି ହେବ ସେବା ।