ଅନେକ ଦୃଷ୍ଟିରୁ ରହିଛି କଲମୀ ଟମାଟୋର ବିଶେଷତ୍ୱ । ଏହାର ଚାରା ଝାଉଁଳା ରୋଗ ପ୍ରତିରୋଧି ହୋଇଥିବା ବେଳେ ରୋପଣର ଦୁଇମାସ ପରେ ଦେଉଛି ଅମଳ । ଗଛର ଆକାର ବଡ଼ ହୋଇଥିବା ବେଳେ ଲମ୍ବା ସମୟ ଧରି ଫଳୁଛି ଫଳ । ପାରମ୍ପରିକ ଟମାଟୋ ଠାରୁ ଏହା ଆକାରରେ ବଡ଼ ହୋଇଥିବା ବେଳେ ସ୍ୱାଦ ଦୃଷ୍ଟିରୁ ମଧ୍ୟ ନିଆରା । ଏସବୁ ଜାଣିବା ପରେ କେନ୍ଦୁଝର ଜିଲ୍ଲା ହରିଚନ୍ଦନପୁର ବ୍ଲକ ଧୋରଡିଆମ୍ବ ପଂଚାୟତ ଅନ୍ତର୍ଗତ ଜାମୁଦା ଗାଁର ଅଗ୍ରଣୀ ମହିଳା ଚାଷୀ ଦମୟନ୍ତୀ ନାୟକ ନିଜର ୨୫ ଡିସିମିଲି ଜମିରେ ଲଗାଇଥିଲେ ଗ୍ରାଫ୍ଟିଙ୍ଗ ଟମାଟୋ । ଗୋଟି ପ୍ରତି ୧୩ ଟଙ୍କା ଦରରେ ବାହାରୁ ଚାରା ଆଣି ଦେଖିଥିଲେ ସ୍ବପ୍ନ । ଶ୍ରମ ,ତଦାରଖ ,ନିଷ୍ଠା ଓ ବ୍ୟବସ୍ଥା ଠିକ ରହିବାରୁ ରୋପଣର ଦୁଇମାସ ପରେ ଆସିଥିଲା ଫଳ । ଦମୟନ୍ତୀ ଏବେ ୫୦ ହଜାର ଟଙ୍କାର ଟମାଟୋ ବିକ୍ରି କରିବାରେ ସଫଳ ହୋଇଛନ୍ତି । ଆଗକୁ ଲକ୍ଷେ ଟଙ୍କାର ଟମାଟୋ ବାହାରିବ । ଗ୍ରାଫ୍ଟିଙ୍ଗ ଟମାଟୋ ହେଉଛି ଦୁଇଟି ଚାରା ର ସଫଳ ସଂଯୋଗ । ଏହାର ମୂଳ ଜଙ୍ଗଲୀ ଭେଜି ବାଇଗଣ ହୋଇଥିବା ବେଳେ ଡାଳ ଗୁଡିକ ଟମାଟୋ । ହୃଷ୍ଟପୁଷ୍ଟ ମୂଳ ଖାଦ୍ୟସାର ଯୋଗାଡ଼ କରି ଗଛର ବିକାଶ କରାଏ । ବଡ଼ ଆକାରର ଗଛ ଓ ଫଳ ହୁଏ ।
ଦମୟନ୍ତୀ ବୁନ୍ଦା ଜଳସେଚନ ସହିତ ମଲଚିଙ୍ଗ ପଦ୍ଧତିରେ କରିଛନ୍ତି ଚାଷ । ଗଛ ଗୁଡିକୁ ଢ଼େରା ଦେବାକୁ ବାନ୍ଧି ଦେଇଛନ୍ତି ବାଉଁଶ ସହିତ ରଶି । ଗୋଟିଏ ଗୋଟିଏ ଗଛରୁ ଦଶ କେଜିରୁ ଅଧିକ ଫଳ ଅମଳ ହେବ । ବିଗତ ମାସେ ହେଲା ଦୈନିକ ତୋଳାଯାଉଛି ଟମାଟୋ । କିଛି ଗଛରୁ ପୁରା ଅମଳ ହୋଇସାରିଥିବା ବେଳେ ଆଉ କିଛି ଗଛରେ ଆସିଛି ଫୁଲ ଓ କଷି । ବାଛି ବାଛି ପାଚିଲା ଟମାଟୋ ତୋଳାଯାଉଛି । ଆଗକୁ ଆଉ ଦୁଇମାସ ଯାଏଁ ଏମିତି ମିଳୁଥିବ ଅମଳ । ୨୫ ଡିସିମିଲି ଜମିରେ ଲାଗିଥିବା ୧୫୦୦ ଚାରାରୁ ୬ ମାସରେ ସମୁଦାୟ ମିଳିବ ଦେଢ଼ଲକ୍ଷ ଟଙ୍କାର ଟମାଟୋ । କମ ପରିଶ୍ରମ ,କମ ପାଣି ଓ ଅଧିକ ଲାଭ ମିଳୁଥିବାରୁ ଆଗାମୀ ବର୍ଷ ଅଧିକ କିଛି ଚାଷୀ ଏ ଫସଲ କରିବେ । ନିଜେ ସାହସର ସହିତ ନୂଆ ଫସଲ କରି ଦମୟନ୍ତୀ ଅନ୍ୟ ଚାଷୀଙ୍କ ପାଇଁ ପାଲଟିଛନ୍ତି ମାର୍ଗଦର୍ଶକ ।