ନବରଙ୍ଗପୁରର ସାପ୍ତାହିକ ହାଟ ଗୁଡିକରେ ଛୋଟ ଦେଶୀ ଶୁଖୁଆର ଭାରି ଚାହିଦା । ସ୍ଥାନୀୟ ଲୋକେ ଏହାକୁ କହନ୍ତି ତୁରୁ ସୁକସି । ସୁକସି ଅର୍ଥ ଶୁଖୁଆ । ନଈ,ନାଳ ,ଧାନବିଲ ଓ ଗଡିଆ ଗୁଡ଼ିକରୁ ବର୍ଷାଦିନେ ଧରାପଡନ୍ତି ନାନା ପ୍ରକାରର ଦେଶୀ ମାଛ । ଏହା କେହି ଚାଷ କରିନଥାନ୍ତି । ଜଳାଶୟ ଗୁଡିକରେ ଆପେ ବଢନ୍ତି । ଏଥିରେ ନା ପଡେ ସାର ନା ଦେବାକୁ ପଡେ କାରଖାନାରୁ ପ୍ରସ୍ତୁତ ଖାଦ୍ୟ । ତେଣୁ ଏହା ସ୍ୱାଦିଷ୍ଠ ଓ ସ୍ୱାସ୍ଥ୍ୟ ପାଇଁ ବହୁତ ଭଲ । କୋରାପୁଟିଆ ଚାଷୀ ଏହାକୁ ଜଳାଶୟ ଗୁଡ଼ିକରୁ ଯତ୍ନର ସହିତ ଧରି ଆଣନ୍ତି । ଏହାକୁ ଭଲଭାବେ ରୋଷେଇ ଘରର ଚୁଲି ନିକଟରେ ଶୁଖାଇ ଦିଆଯାଏ । କେବେ କେବେ ଟାଣ ଖରାରେ ମଧ୍ୟ ଶୁଖାଇ ପ୍ରସ୍ତୁତ କରାଯାଏ ଶୁଖୁଆ । ଭଲ ଭାବେ ଶୁଖିଯିବା ପରେ ଏହାର ରଙ୍ଗ ବଦଳିଯାଏ ଓ ଅନେକ ଦିନ ସାଇତି ରଖି ବ୍ୟବହାର କରିବା ପାଇଁ ଯୋଗ୍ୟ ହୋଇଥାଏ । ଅଧିକ ଦିନ ସାଇତି ରଖି ପରିବା ନ ଥିବା ଋତୁରେ ବ୍ୟବହାର ହେଉ ଥିବାରୁ ପ୍ରତିଟି ଘରେ ରହିଛି ଏହାର ଆଦର । ଅଧିକ ଦର ରହିଥିବା ସତ୍ୱେ ସ୍ୱାଦିଷ୍ଟ ହୋଇଥିବାରୁ ଲୋକେ ଏହାକୁ କିଣି ନେଇଥାନ୍ତି ।
ନବରଙ୍ଗପୁର ଜିଲ୍ଲା କୋଷାଗୁମୁଡା ଶୁକ୍ରବାର ହାଟରେ ମିଳେ ତୁରୁ ସୁକସି । ଆଖପାଖ ଅଂଚଳର ମହିଳା ବିକ୍ରେତା ମାନେ ହାଟରେ ଖୋଲନ୍ତି ଶୁଖୁଆ ପସରା । ଖୋଲିବା ମାତ୍ରେ ଜମେ ଗ୍ରାହକଙ୍କ ଭିଡ଼ । ଲୋକଙ୍କ ପ୍ରିୟ ଖାଦ୍ୟ ସୂଚୀରେ ସୁକସି ସାମିଲ ଥିବାରୁ କିଣିନେବାକୁ ଥାଏ କ୍ରେତାଙ୍କ ଆଗ୍ରହ । ପଡୋଶୀ ଛତିଶଗଡ଼ ,କୋଟପାଡ଼ ଓ ଉମରକୋଟରୁ ବେପାରୀ ଆସି ଏଠାରୁ କିଣିନେଉଥିବାରୁ ଦାମ ଟିକେ ଉଚ୍ଚ ରହିଛି । ପାରମ୍ପରିକ ଶୁଖୁଆ ତିଆରି କୌଶଳ ଓ ପୁରୁଣା ଲୋକଙ୍କ ଏହା ପ୍ରତି ଆଗ୍ରହ ଏହି ବ୍ୟବସାୟକୁ ବଜାୟ ରଖିଛି । ଜିଲ୍ଲାର ଅଧିକାଂଶ ପରିବାର ଏହି ଛୋଟ ଦେଶୀ ଶୁଖୁଆକୁ ନେଇ ରାନ୍ଧି ଜାଣନ୍ତି ସ୍ୱାଦିଷ୍ଟ ବ୍ୟଞ୍ଜନ । ଅଳ୍ପ ତେଲ ଓ ବିନା ମସଲାରେ କେବଳ ହଳଦୀ ,ଲଙ୍କା ,ପିଆଜ ଟମାଟୋ ଦେଇ ଏହା ରନ୍ଧାଯାଏ । ପାଟିକୁ ରୁଚେ ଓ ଭାତ ଉଠିଯାଏ ବୋଲି କହନ୍ତି ଖାଉଟି ।