ସୁନ୍ଦରଗଡ଼ ଜିଲ୍ଲା ଟାଙ୍ଗରପାଲି ବ୍ଲକ ଅଧୀନରେ ରହିଛି ଛୋଟ ଏକ ଗାଁ ଫୁଲଡୁଡି । ଏହି ଗାଁରେ ସମୁଦାୟ ୬୩ ପରିବାର । ସବୁ ପରିବାର କାଲୋ ସମ୍ପ୍ରଦାୟର । ବର୍ଷ ବର୍ଷ ଧରି ଏହି ସମ୍ପ୍ରଦାୟ ଅଭାବ ସହିତ ସଂଘର୍ଷ କରିଆସିଛି । ୨୦୧୯ ମସିହାରେ ଏହି ଗାଁର ବିକାଶ ପାଇଁ ଓଡିଶା ଫରେଷ୍ଟ ସେକ୍ଟର ଡେଭଲପମେଣ୍ଟ ପ୍ରକଳ୍ପ ପକ୍ଷରୁ ଗାଁର ପ୍ରତିଟି ପରିବାରର ମହିଳାଙ୍କୁ ନେଇ ପାଳଛତୁ ଚାଷ ଓ ଜିଆ ଖତ ଉତ୍ପାଦନ ଜରିଆରେ ଆର୍ଥିକ ସ୍ଥିତିର ପରିବର୍ତ୍ତନ ଦିଗରେ କାର୍ଯ୍ୟ ଆରମ୍ଭ ହୋଇଥିଲା । ଗାଁରେ ଗଢାଯାଇଥିବା ମା ଶାରଳା ସ୍ୱୟଂ ସହାୟକ ଦଳ ଓ ଓଁ ନମଃ ଶିବାୟ ସ୍ୱୟଂ ସହାୟକ ଦଳକୁ ମିଶାଇ ଉତ୍ପାଦିକା ଦଳ ଗଠନ କରାଗଲା । ଆୟକାରୀ ଧନ୍ଦା ଜରିଆରେ ପାରିବାରିକ ଆର୍ଥିକ ସ୍ଥିତିରେ ପରିବର୍ତ୍ତନ ପାଇଁ ମହିଳାମାନଙ୍କ ଇଛା ଓ ଆଗ୍ରହକୁ ସପୋର୍ଟ କରିଥିଲା ଓଡିଶା ସରକାରଙ୍କ ବନ ବିଭାଗ । ସୁନ୍ଦରଗଡ଼ ବନ ବିଭାଗ ଓ କୃଷି ବିଜ୍ଞାନ କେନ୍ଦ୍ର ମହିଳାମାନଙ୍କୁ ବିଭିନ୍ନ ପର୍ଯ୍ୟାୟରେ ତାଲିମ ,କଞ୍ଚାମାଲ ଓ ପରିଚାଳନା ଖର୍ଚ୍ଚ ଦେବା ପରେ ଗାଁର ପ୍ରତିଟି ପରିବାରର ମହିଳା ମାନେ ସାମୁହିକ ଛତୁ ଚାଷ ସହିତ ଜିଆଖତ ୟୁନିଟ ଖୋଲି ବର୍ଷ ଶେଷରେ ମୋଟା ମୁନାଫା କମାଇବାରେ ସଫଳ ହେଲେ ।
ଶାରଳା ସ୍ୱୟଂ ସହାୟକ ଦଳର କେତକୀ ଜଣେ ଅଭାବୀ ମହିଳା । ଛତୁଚାଷ କରିବା ପୂର୍ବରୁ ସେ ଡୋମାଷ୍ଟିକ ୱାର୍କର ଥିଲେ । ୨୦୧୯ରେ ସେ କୃଷି ବିଜ୍ଞାନ କେନ୍ଦ୍ର ଓ ବନ ବିଭାଗରୁ ତାଲିମ ପାଇବା ପରେ ସାମୁହିକ ଛତୁଚାଷରେ ଯୋଡି ହେଲେ । ଗତବର୍ଷ କେତକୀଙ୍କ ଦଳ ୩୫୦ କ୍ୟୁଣ୍ଟାଲ ପାଳଛତୁ ବାହାର ବ୍ୟବସାୟୀଙ୍କୁ ବିକ୍ରି କରିଛନ୍ତି। ସେହିପରି ଏହି ଗାଁର ମହିଳାମାନେ ବାର୍ଷିକ ୨୧୨୦ କ୍ୟୁଣ୍ଟାଲ ଜିଆ ଖତ ବିକ୍ରିକରି ମୁଣ୍ଡପିଛା ୨ଲକ୍ଷ ଟଙ୍କା ରୋଜଗାର କରିଛନ୍ତି । ଏବେ ଗାଁର ପ୍ରତିଟି ପରିବାର ବ୍ୟବସ୍ଥିତ ଭାବେ ଧାନ ,ମାଛ ,ପରିବା ଓ ଜିଆ ଖତ ଉତ୍ପାଦନ କରି ମୋଟ ୩ ଲକ୍ଷ ଟଙ୍କା ରୋଜଗାର କରି ଗରିବୀର ସୀମା ଅତିକ୍ରମ କରିଛନ୍ତି । ସରକାରୀ ଯୋଜନାର ସଫଳ ରୂପାୟନ ସାଙ୍ଗକୁ ମହିଳା ଦଳଙ୍କ ମିଳିତ ପ୍ରୟାସ ଏହାକୁ ସମ୍ଭବ କରାଇଛି ।