ସି ଏସ ରାଓ - କାଟ୍ରାକ୍ଟ କାରଣରୁ ଦୁଇ ଆଖିରୁ ହରାଇଥିଲେ ଜ୍ୟୋତି । କିନ୍ତୁ ଜୀବନ ଯୁଦ୍ଧରେ ହାରି ନଥିଲେ । ନିଜ ପ୍ରଚଣ୍ଡ ଇଛାଶକ୍ତିକୁ ଜାଗରୁକ କରି ଅଧ୍ୟବସାୟରେ ଅଟଳ ରହି ସଫଳ ହେଲେ । ବ୍ରେଲି ଅକ୍ଷର ଚିହ୍ନିବାରେ ମାଷ୍ଟର ହେବା ସହିତ ଭଏସ ରେକର୍ଡ ଜରିଆରେ ନିଜ ଭାବନାକୁ ଅନ୍ୟ ନିକଟରେ ପହଞ୍ଚାଇ ଅନେକଙ୍କ ଜୀବନରେ ଆଣିଛନ୍ତି ପରିବର୍ତ୍ତନ । ଏହି କାହାଣୀ ହେଉଛି ଚେନେମା ସୂର୍ଯ୍ୟସ୍ନାତା ରାଓଙ୍କର । ତାଙ୍କର ଶୈଶବ ସୁଖ କଣ ଜାଣିନି । ପାଟିରୁ ଶବ୍ଦ ଉଚ୍ଚାରଣ ପୂର୍ବରୁ ଜୀବିକା ପାଇଁ ତାଙ୍କ ପିତାମାତା ଭିଟାମାଟି ଛାଡିଲେ । କଡପ୍ପା ସହରରେ ଭଡ଼ାଘରେ ରହି ଦିନ ମଜୁରିଆ ଭାବେ ପରିବାର ପୋଷୁଥିଲେ ତାଙ୍କ ପିତା । ସୂର୍ଯ୍ୟସ୍ନାତାଙ୍କୁ ଯେତେବେଳେ ୫ ବର୍ଷ ସେତେବେଳେ ସେ ଦୁଇଟି ଆଖିକୁ ହରାଇଥିଲେ । ଅନ୍ଧ ଆଖିରେ ଦୁନିଆ ଯେତେବେଳେ ତାଙ୍କ ପାଇଁ ଅନ୍ଧାର ଲାଗୁଥିଲା ସେତେବେଳେ ତାଙ୍କ ବାପା ଏକ ଦୃଷ୍ଟି ବାଧିତ ବିଦ୍ୟାଳୟରେ ବ୍ରେଲି ପଢ଼ିବାର ସୁଯୋଗ ଦେଲେ । ସୁନ୍ଦର ଗୀତ ,ଅଭିନୟ ସହିତ ଶ୍ରେଣୀରେ ସବୁଠୁ ଭଲ କରୁଥିଲେ ସୂର୍ଯ୍ୟସ୍ନାତା ।
୧୯୯୭ ରେ ସେ ତିରୁପତିରୁ ଡିଗ୍ରୀ ଶେଷ କଲେ । ସ୍ନାତକୋତ୍ତର ଶିକ୍ଷା ଓ ଶିକ୍ଷକ ତାଲିମରେ ଜିଲ୍ଲାରେ ପ୍ରଥମ ୧୦ ଜଣଙ୍କ ଭିତରେ ରହି ୨୦୦୩ ରେ ୨୪ ବର୍ଷ ବୟସରେ ଜୁନିୟର ଆସିଷ୍ଟାଣ୍ଟ ଭାବେ କଡପ୍ପା ମହିଳା ବିଦ୍ୟାଳୟରେ କାମ କଲେ । ରାଜୁ ପାଲେମ ଗାଁର ଏକ ଗରିବ କୁମ୍ଭକାର ଗାଁର ଝିଅ ସୂର୍ଯ୍ୟସ୍ନାତା କିଛି ବର୍ଷ ଭିତରେ ଅଧ୍ୟାପକରୁ ବନିଗଲେ ଅଧ୍ୟକ୍ଷ । ଶ୍ରେଣୀ ପ୍ରକୋଷ୍ଠ ବାହାରେ ସେ ଗରିବ ମହିଳା ମାନଙ୍କୁ ରୋଜଗାରର ବାଟ ଦେଖାଇଲେ । ଦୃଷ୍ଟି ବାଧିତ ଯୁବତୀ ମାନଙ୍କ ଶିକ୍ଷା ,ଆତ୍ମନିର୍ଭରତା ଓ ସାମର୍ଥ୍ୟ ବୃଦ୍ଧି ଦିଗରେ ନିୟମିତ ଶିକ୍ଷା ଓ ପ୍ରେରଣା ଦେଇ ସେ ପାଲଟିଛନ୍ତି ଜଣେ ଆଦର୍ଶ ଅଧ୍ୟକ୍ଷା । ନିଜ ଆଖିର ବହଳ ଅନ୍ଧକାର ଭିତରେ ସେ ଅନ୍ୟ ପାଇଁ ଆଲୋକ ଖୋଜି ସାଉଣ୍ଟିଛନ୍ତି ପ୍ରସଂଶା ।