ଯେଉଁ ଅଳିଆ ଦିନେ ସୃଷ୍ଟି କରୁଥିଲା ପୁତିଗନ୍ଧମୟ ପରିବେଶ ଏବେ ସେଥିରୁ ତିଆରି ହେଉଛି ଜୈବିକ ଖତ । ଏହି ଖତର ବିକ୍ରିଲବ୍ଧ ଆୟରେ ମହିଳା ସ୍ୱଚ୍ଛକର୍ମୀଙ୍କୁ ମିଳୁଛି ପାରିଶ୍ରମିକ । ସ୍ବାମୀଙ୍କ ହାତଟେକା ଅର୍ଥକୁ ଅପେକ୍ଷା କରୁଥିବା ମହିଳା ଏବେ ବର୍ଜ୍ୟ ଅଳିଆରୁ ଆୟ କରି ଘରର ଖର୍ଚ୍ଚରେ କରୁଛନ୍ତି ସହଯୋଗ । ଏଭଳି ଦୃଷ୍ଟାନ୍ତ ମୂଳକ ଦୃଶ୍ୟ ଦେଖିବାକୁ ମିଳିଛି ଗଂଜାମ ଜିଲ୍ଲା କୋଦଳା ବିଜ୍ଞାପିତ ଅଂଚଳ ପରିଷଦରେ । ଦିନେ ଅଳିଆ ଆବର୍ଜନା ପାଇଁ କୋଦଳା ଚର୍ଚ୍ଚାରେ ଥିଲା । ଏବେ ଧୀରେ ଧୀରେ ଦେଖିବାକୁ ମିଳିଛି ପରିବର୍ତ୍ତନ । ସକାଳ ହେବା ମାତ୍ରେ ମହିଳା ସ୍ୱଚ୍ଛକର୍ମୀ ଦ୍ୱାର ମୁହଁରୁ ସଂଗ୍ରହ କରୁଛନ୍ତି ଅଳିଆ । ଓଦା ଓ ଶୁଖିଲା ଅଳିଆ ସଂଗ୍ରହ କରାଯାଇ ମାଇକ୍ରୋ କାମ୍ପୋଷ୍ଟିଙ୍ଗ କେନ୍ଦ୍ରକୁ ଅଣାଯାଉଛି । ବ୍ୟାଟେରୀ ଚାଳିତ ଅଳିଆ ଗାଡିର ଡ୍ରାଇଭିଙ୍ଗ ଠାରୁ ଆରମ୍ଭ କରି ଅଳିଆର ପୃଥକୀକରଣ ଯାଏଁ ପ୍ରାୟ କାମରେ ଦେଖିବାକୁ ମିଳିଛି ମହିଳାଙ୍କ ସଂଖ୍ୟାଧିକ ଯୋଗଦାନ । ଏହି କାମ ସେମାନଙ୍କୁ ସିଧାସଳଖ ରୋଜଗାର ଦିଗରେ କରାଇଛି ସକ୍ଷମ ।
ସ୍ୱଚ୍ଛ ଭାରତ ଅଭିଯାନରେ ବଦଳିଛି ଚିତ୍ର । ପ୍ରତିଟି ପରିବାରରେ ଶୌଚାଳୟ ସହିତ ଚାଲିଛି ପରିମଳ କାର୍ଯ୍ୟକ୍ରମ । କୋଦଳା ବିଜ୍ଞାପିତ ଅଂଚଳ ପରିଷଦର ଅଧ୍ୟକ୍ଷ ସୂର୍ଯ୍ୟନାରାୟଣ ନାୟକଙ୍କ ନେତୃତ୍ୱରେ କୋଦଳାର ପରିମଳ ପ୍ରତି ଦିଆଯାଇଛି ପ୍ରାଥମିକତା । ସଂଗ୍ରହ ପରେ ଜମା ହେଉଥିବା ଅଳିଆରୁ ତିଆରି ହେଉଛି ଜୈବିକ ଖତ । କଠିନ ବର୍ଜ୍ୟ ବସ୍ତୁ ଗୁଡିକୁ ତରଳ ବର୍ଜ୍ୟ ଠାରୁ ଅଲଗା ହେଉଛି । ଉଭୟର ପରିଚାଳନା ପାଇଁ ବସାଯାଇଛି ଭିନ୍ନ ଭିନ୍ନ ମେସିନ । ନିୟୋଜିତ କର୍ମଚାରୀଙ୍କ ସୁରକ୍ଷା ପ୍ରତି ଧ୍ୟାନ ଦେଇ କରାଯାଉଛି ଏସବୁ କାମ । ଅଳିଆ ସଂଗ୍ରହ କାମରେ ନିୟୋଜିତ କର୍ମୀ ମାନେ ପ୍ରତ୍ୟହ ସକାଳ ୬ରୁ କାମରେ ନିୟୋଜିତ ହେଉଥିବା ବେଳେ ମାଇକ୍ରୋ କାମ୍ପୋଷ୍ଟିଙ୍ଗ କେନ୍ଦ୍ରରେ ନିୟୋଜିତ କର୍ମୀ ମାନେ ଦୁଇଟି ପର୍ଯ୍ୟାୟରେ କାମ କରୁଥିବା ଦେଖିବାକୁ ମିଳୁଛି । ଏହା ଦ୍ୱାରା ସହରରେ ପରିମଳର ଚିତ୍ର ବଦଳୁଥିବା ବେଳେ ସଶକ୍ତ ହେଉଛନ୍ତି ମହିଳା ।