ପୁଡୁଚେରୀରେ କେବଳ ମହିଳାଙ୍କୁ ନେଇ ଖୋଲିଛି ସାଇନ ଆଣ୍ଡ ଡାଇନ ନାଁରେ ଏକ କ୍ୟାଟେରିଙ୍ଗ ୟୁନିଟ । ଏହାର ମୁଖ୍ୟ ହେଉଛନ୍ତି ସୁବା ନାମ୍ନୀ ଜଣେ ମହିଳା ଯିଏକି ଜନ୍ମରୁ ଶ୍ରାବ୍ୟ ବାଧିତ । ଦିବ୍ୟାଙ୍ଗ ମାନଙ୍କ ଜୀବିକା ଓ ସମ୍ମାନ ପାଇଁ ସଂଘର୍ଷ ତାଙ୍କୁ କମ ବୟସରେ ଏଭଳି ଏକ ବ୍ୟବସାୟ ପାଇଁ ପ୍ରେରଣା ଦେଇଛି ।
ସୁବା ନିଜ କ୍ୟାଟେରିଙ୍ଗ ୟୁନିଟରେ ବିଧବା ,ଅସହାୟ ,ଏକାକୀ ରହୁଥିବା ମହିଳାଙ୍କୁ କାମ ଦେଇଛନ୍ତି । ଦିନେ ଯେଉଁମାନେ ମୁଠାଏ ଖାଦ୍ୟ ଯୋଗାଡ଼ ପାଇଁ ସଂଘର୍ଷ କରୁଥିଲେ ସେମାନେ ଆଜି ସମ୍ମାନର ସହିତ କ୍ୟାଟେରିଙ୍ଗ ୟୁନିଟରେ ବ୍ରେକଫାଷ୍ଟ ,ଲଞ୍ଚ ଓ ଡିନର ପ୍ରସ୍ତୁତ କରୁଛନ୍ତି ଓ ସମ୍ମାନର ସହିତ ଜୀବନ ଅତିବାହିତ କରୁଛନ୍ତି ।ଏଭଳି ଜଣେ ମହିଳା ହେଉଛନ୍ତି ୩୨ ବର୍ଷ ବୟସର ବି .ଭାନୁମଥି। ଭାନୁମଥି ଯେତେବେଳେ ଦୁଇମାସର ଗର୍ଭବତୀ ଥିଲେ ସେତେବେଳେ ତାଙ୍କ ସ୍ୱାମୀଙ୍କ ମୃତ୍ୟୁ ଘଟିଥିଲା । ନିଜେ ଖାଇ ପିଲା ମୁହଁରେ ଗଣ୍ଡେ ଆହାର ଦେବାକୁ ତାଙ୍କ ନିକଟରେ ନାଁ ଥିଲା କାମ ନାଁ ଥିଲା ସଂଚୟ କି କାହାର ସହଯୋଗ । ଜଣେ ସମ୍ପର୍କୀୟଙ୍କ ଜରିଆରେ ସେ ପୁଡୁଚେରୀ ଆସି ସୁବା ଙ୍କୁ ଭେଟିଲେ ଓ କ୍ୟାଟେରିଙ୍ଗ ୟୁନିଟରେ କାମ ପାଇଲେ ।
ଭାନୁମଥି ଙ୍କ ପରି ସମାନ କାହାଣୀ ମଧ୍ୟ ୪୦ ବର୍ଷର ଭି .ସେଲଭିଙ୍କର । ଦିବ୍ୟାଙ୍ଗ ସେଲଭି ଥିଲେ ଘରୋଇ ପରିଚାରିକା । ଚୋରି ଅପରାଧରେ ମାଲିକ ତଡ଼ିଦେବା ପରେ ସେ ପୁଡୁଚେରୀ ସହରକୁ କାମ ଖୋଜି ଖୋଜି ଆସିଥିଲେ । ଜନ୍ମରୁ ସେ ବାକବାଧିତ ଥିବାରୁ କଥା କହିପାରୁନଥିଲେ । କିନ୍ତୁ ସେ ଅନେକ ପ୍ରକାର ରୋଷେଇ ପ୍ରସ୍ତୁତ କରିବାରେ ମାହିର ଥିଲେ । ସୁବାଙ୍କ କ୍ୟାଟେରିଙ୍ଗ ଟିମ ଆଜି ଏଭଳି କାମ ଚାହୁଁଥିବା ମହିଳାଙ୍କ ଦ୍ୱାରା ପରିଚାଳିତ ହେଉଛି । ଦିନକୁ ପ୍ରସ୍ତୁତ ହେଉଛି ୭୦୦ ମିଲ । ଅଫିସ ,ହଷ୍ଟେଲ ,ହୋଟଲକୁ ରୋଟୀ ଓ ଭୋଜନ ଯୋଗାଇବା ସହିତ ସାମାଜିକ କାର୍ଯ୍ୟକ୍ରମ ପାଇଁ ମଧ୍ୟ ରଖନ୍ତି ଅର୍ଡର । ସୁବା ଦେଖୁଥିବା ସ୍ୱପ୍ନରେ ଉଡାଣ ଭରିବା ପାଇଁ ଭାନୁମଥି ,ସେଲଭି ଭଳି ଅନେକ ନିଷ୍ଠାପର କର୍ମୀଙ୍କ ହାତର ରହିଛି ଯାଦୁ।