ଗୀତକୁ ନେଇ ବିଭୋର ହେଉଥିବା ଜଣେ ନିଆରା ମଣିଷ ହେଉଛନ୍ତି ଭଦ୍ରକ ଜିଲ୍ଲା ବନ୍ତ ବ୍ଲକ ସାନ ସାନ୍ଦୋଡ଼ ଗାଁର ମମତା ଜେନା । ମମତା ନିପଟ ମଫସଲ ଗାଁର ଜଣେ ଗୃହିଣୀ ଯିଏକି ନିଜର ସୁଲଳିତ କଣ୍ଠର ଯାଦୁରେ ସଂଗୀତର ଅମୃତ ଝରଣା ସୃଷ୍ଟି କରିଛନ୍ତି ! ତାଙ୍କର ଏହି ମିଠା ସ୍ୱରକୁ ଯିଏ ଶୁଣୁଛି ସିଏ କରୁଛି ତାରିଫ । ମମତାଙ୍କ ପାଖରେ ନା ଅଛି ସଂଗୀତ ଶିକ୍ଷାର ଉପାଧି ନା ରହିଛି ଆନୁଷ୍ଠାନିକ ଶିକ୍ଷା । କିନ୍ତୁ ତାଙ୍କର ଗୀତ ଏବେ ମୋବାଇଲିରୁ ମୋବାଇଲକୁ ଘୁରିବୁଲି ଭାଇରାଲ ହେବାରେ ଲାଗିଛି । ପୂଜା ସମୟରେ ହେଉ ଅବା ଫୁଲ ତୋଳିବା ବେଳେ ଗୁଣୁଗୁଣୁ ହୋଇ ସେ ଗାଇଥାନ୍ତି ଠାକୁରଙ୍କ ଜଣାଣ ଆଉ ଭଜନ । ଏହା ଯେଭଳି ମିଠା ସେଭଳି ହୃଦୟସ୍ପର୍ଶୀ । ଏସବୁ ଗୀତକୁ ନିଜ ମୋବାଇଲରେ ରେକର୍ଡ କରି ଇନଷ୍ଟାରେ ଅପଲୋଡ଼ କରିଥିଲେ ତାଙ୍କର ଝିଆରୀ ଦୀପିକା । ବଡ଼ମା ମମତାଙ୍କର ୨୦ ଟି ଗୀତ ଇନଷ୍ଟାରେ ଅପଲୋଡ଼ କରିବା ପରେ ଗୋଟିଏ ଜଗନ୍ନାଥ ଭଜନ ଭାଇରାଲ ହୋଇଯାଇଥିଲା । ଦଶଲକ୍ଷରୁ ଅଧିକ ଦର୍ଶକ ମମତାଙ୍କ ଗୀତର ମାୟାରେ ବାନ୍ଧି ହୋଇଥିଲେ । ଏହା ମମତାଙ୍କୁ ପୁଣି ଗୀତ ଗାଇବା ପାଇଁ ଉତ୍ସାହିତ କରାଇଛି ।
ନିକଟରେ ଆରଏସଆର ପକ୍ଷରୁ କଟକର ପବିତ୍ର ସ୍ଟୁଡ଼ିଓରେ ତାଙ୍କର ୬ଟି ଗୀତକୁ ରେକର୍ଡିଙ୍ଗ କରାଯାଇଥିବା ବେଳେ ଗୋଟିଏ ଗୀତ ମୁକ୍ତିଲାଭ କରି ଶ୍ରୋତାଙ୍କ ପସନ୍ଦ ପାଲଟିଛି । ମମତାଙ୍କ ଗୀତ ମାୟା ପଛରେ ରହିଛି ବାପା ଜୁଜ ଦଳେଇଙ୍କ ପ୍ରେରଣା । ତାଙ୍କ ଠାରୁ ଗୀତ ଗାଇବା ଶିଖି ସେ ସ୍କୁଲ ପ୍ରତିଯୋଗିତାରୁ ଗାଁ ସଂକୀର୍ତ୍ତନ ,ମେଲୋଡି ଓ ଯାତ୍ରା ମଞ୍ଚକୁ ଆସିଛନ୍ତି । ୧୨ ବର୍ଷ ବୟସରେ – ଯାତ୍ରା ପାର୍ଟିରେ ଯୋଗଦେଇ ଗୀତକୁ ସେ ପେଶା କରିଥିଲେ । ପରବର୍ତ୍ତୀ ସମୟରେ ସେହି ଯାତ୍ରାପାର୍ଟିର ତବଲା ବାଦକ ଜଳଧର ଜେନାଙ୍କୁ ବିବାହ କରି ସଂଗୀତ ଦୁନିଆରୁ ନେଇଥିଲେ ବିରତି । ଏବେ ହଜିଯାଇଥିବା ସୁରକୁ ପୁଣି ତୋଳି ଧରିଛି ସୋସିଆଲ ମିଡ଼ିଆ । ନିଷ୍ପ୍ରଭ ହୋଇଯାଇଥିବା ସ୍ୱର ଶ୍ରୋତାଙ୍କ ହୃଦୟକୁ ଛୁଇଁଛି ।