କୁଟୀର ଶିଳ୍ପ ପାଲଟିଛି କାଇଁଚ କାରିଗରୀ । ଗ୍ରାମୀଣ ମହିଳାଙ୍କ ଅତିରିକ୍ତ ଜୀବିକାରେ କରିଛି ସହାୟତା । କାଇଁଚରୁ ତିଆରି ହେଉଛି ମନଲୋଭା ହସ୍ତକଳା । ଏହି ପ୍ରାକୃତିକ ସାଧନରୁ ଅତି ସୁନ୍ଦର ସାଜସଜ୍ଜା ସାମଗ୍ରୀ ତିଆରି କରି ସ୍ୱାବଲମ୍ବୀ ହୋଇଛନ୍ତି ଜଗତସିଂହପୁର ଜିଲ୍ଲା ବାଲିକୁଦା ବ୍ଲକ ଥାଇଲୋ ପଂଚାୟତର ୪୫ ମହିଳା । ଆଖପାଖ ୧୦ ଟି ଗାଁ ଓ ୧୭ ଟି ସ୍ୱୟଂ ସହାୟକ ଦଳର ମହିଳା ମାନେ ୨୦୧୫ ମସିହାରୁ ପ୍ରଗତି କାଇଁଚ ଉତ୍ପାଦକ ଦଳ ଗଢି ଆରମ୍ଭ କରିଛନ୍ତି ଆତ୍ମ ନିର୍ଭରତାର ଏପରି ଅନନ୍ୟ ଯାତ୍ରା । ଏହି ଯାତ୍ରାର ବିଭିନ୍ନ ପର୍ଯ୍ୟାୟରେ ସେମାନେ ସଂଘର୍ଷରୁ ସଫଳତାର ସୋପାନ ଆରୋହଣ କରିଛନ୍ତି । ବ୍ୟକ୍ତିଗତ ନିଷ୍ଠା ଓ ଚେଷ୍ଟା ସାଙ୍ଗକୁ ସରକାରୀ ସହଯୋଗ ସେମାନଙ୍କ ହସ୍ତକଳାକୁ ଆଗକୁ ନେଇଛି । ଏହା ଜରିଆରେ ସେମାନେ ଅତିରିକ୍ତ ଦୁଇ ପଇସା ରୋଜଗାର କରିବା ସହିତ ଜାତୀୟ ମଞ୍ଚରେ ସମ୍ମାନିତ ହୋଇଛନ୍ତି । ସେମାନଙ୍କ ସାମାଜିକ ଓ ଆର୍ଥିକ ବିକାଶରେ କାଇଁଚ ଦେଇଛି ମୂଲ୍ୟବାନ ଉପଲବ୍ଧି ।
ପଡିଆ ଜମି ଓ ଚାଷ କ୍ଷେତ ଗୁଡିକରେ ଆପେ ଉଠିଥାଏ ଏହି ଗୋଲଡେନ ଗ୍ରାସ । ଏହା ଚାଷ ହେଉନଥିଲେ ହେଁ ଏହାର ରହିଛି ଆର୍ଥିକ ମୂଲ୍ୟ । ନିର୍ଦ୍ଧିଷ୍ଟ ଋତୁରେ ଏହା ଦେଖିବାକୁ ମିଳେ । ଶିଳ୍ପୀମାନେ ସେହି ସମୟରେ ଏହାକୁ ସଂଗ୍ରହ କରି ସାଇତି ରଖି ବର୍ଷସାରା ବ୍ୟବହାର କରିଥାନ୍ତି । ଏହାର ଆଭ୍ୟନ୍ତରୀଣ ଅଂଶ ସ୍ୱର୍ଣ୍ଣିମ ରଙ୍ଗ ଯୁକ୍ତ ହୋଇଥିବାରୁ ଗୋଲଡେନ ଗ୍ରାସ ନାଁରେ ଏହା ଜଣାଶୁଣା । ତେବେ କଟକ ,ଜଗତସିଂହପୁର ,କେନ୍ଦ୍ରାପଡା ଓ ଭଦ୍ରକରେ ଏହାକୁ କାଇଁଚ କୁହାଯାଏ । ପ୍ରଗତି ଉତ୍ପାଦିକା ଦଳର ସଦସ୍ୟ ମାନେ ଏଥିରୁ ଟ୍ରେ ,ପେନଷ୍ଟାଣ୍ଡ ,ବିଞ୍ଚଣା ,ଫୁଲଦାନୀ ,ଛୋଟ ବଡ଼ ପେଡି ଓ ଅନ୍ୟାନ୍ୟ ୧୪୫ ପ୍ରକାରର ସାମଗ୍ରୀ ତିଆରି କରି ବିକ୍ରି କରିଥାନ୍ତି । ଗ୍ରାମୀଣ ମହିଳା ମାନଙ୍କୁ ଏହି କାରିଗରୀ ଜୀବିକା ଦେବା ସହିତ ଆନ୍ତର୍ଜାତୀୟ ଓ ଜାତୀୟ ସ୍ତରରେ ପହଂଚି ଆଣିଛି ଗୌରବ । ବାହାରକୁ ଯିବାର ସୁଯୋଗ ମିଳିବା ସହିତ ସୃଷ୍ଟି ହୋଇଛି ଆତ୍ମ ବିଶ୍ୱାସ । ଥାଇଲୋ ପଂଚାୟତର କାଇଁଚ ସାମଗ୍ରୀ ସିଙ୍ଗାପୁର ଯାଏଁ ପହଂଚି ସୃଷ୍ଟି କରିଛି ନିଆରା ପରିଚୟ ।