ଗାଁଟି କେବଳ ମହିଳାଙ୍କର । ଗାଁର ଚାରିପଟେ ଜଣେ ବି ପୁରୁଷଙ୍କୁ କିଏ କେବେ ଦେଖିନି । କେନିୟାର ଜଣେ ନିର୍ଯ୍ୟାତିତା ମହିଳା ଏହି ନିଆରା ଗାଁର ପ୍ରତିଷ୍ଠାତା । ସେ ଏଠାରେ ଏଭଳି ଗାଁ ବସାଇଛନ୍ତି ଯେଉଁଠି ପୁରୁଷଙ୍କୁ ଗାଁ ଭିତରେ ପ୍ରବେଶ ମନା । ତେବେ କିଏ ଏହି ମହିଳା ? କାହିଁକି ସେ କରିଛନ୍ତି ଏଭଳି ଅଦ୍ଭୁତ ପରିକଳ୍ପନା ? ଆସନ୍ତୁ ଜାଣିବା ।
କେନିଆର ମରୁଭୂମିରେ ଏଭଳି ଏକ ଗାଁ ଅଛି ଯେଉଁଠି ପୁରୁଷ ମାନଙ୍କ ପ୍ରବେଶ ନିଷେଧ । ବିଗତ ୩୦ ବର୍ଷ ଧରି ଏହି ଗାଁରେ ପଶିପାରିନାହାନ୍ତି ପୁରୁଷ । ଗାଁଟିର ନାଁ ହେଉଛି ଓମୁଜା । ଓମୁଜାର ମୁରବି ହେଉଛନ୍ତି ରେବେକା ଲୋଲୋସୋଲି । ରୋବେକା ଏହି ଗାଁ କୁ ବସାଇଛନ୍ତି । ଯେଉଁଠି କେବଳ ମହିଳାମାନେ ହିଁ ରହିପାରିବେ ।ଏଭଳି ନିଷ୍ପତ୍ତିକୁ ପାଳନ କରୁଥିବା ଏହି ଗାଁର କାହାଣୀ ଦୁଃଖଦ । ଓମୁଜା ଗାଁର ପ୍ରତିଷ୍ଠାତା ରେବେକାଙ୍କ ପ୍ରତି ହୋଇଥିବା ଅତ୍ୟାଚାରର ପରିଣାମରେ ଏହି ଗାଁର ହୋଇଥିଲା ସୃଷ୍ଟି । ବଲପୂର୍ଵକ ହୋଇଥିଲା ତାଙ୍କର ବାହାଘର । ତାଙ୍କର ସ୍ୱାମୀ ତାଙ୍କୁ କଥା କଥାକେ ମାଡ଼ ମାରୁଥିଲେ । ନିର୍ଯ୍ୟାତନା ଅସହ୍ୟ ହେବାରୁ ଦିନେ ସେ ଲୁଚି ଘର ଛାଡିଲେ । ଘରୋଇ ହିଂସାର ଶିକାର କ୍ଷେତ୍ରରେ ଏକା ନଥିଲେ ରେବେକା । ସମଦୁଃଖ ଭୋଗୁଥିବା ୧୪ ଜଣ ମହିଳାଙ୍କୁ ସେ ଭେଟିବା ପରେ କେବଳ ମହିଳା ମାନଙ୍କୁ ନେଇ ଏକ ନୂଆ ଦୁନିଆର ପରିକଳ୍ପନା ହେଲା ଓ ନାଁ ଦିଆଗଲା ଓମୁଜା ।
ଓମୁଜା ଗାଁର ମହିଳା ମାନେ ନିଜ ହାତରେ ନିଜ ପାଇଁ ତିଆରି କରିଥାନ୍ତି ଘର । କାଠ ଉପରେ ମାଟିର ଲେପ ଦେଇ ସୁନ୍ଦର ସୁନ୍ଦର ଘର ଗଡ଼ନ୍ତି । ଏକାକୀ ଅଭିଭାବକ ଭାବେ ନିଜର ସନ୍ତାନକୁ ଲାଳନ ପାଳନ କରନ୍ତି । ବିଭିନ୍ନ ପ୍ରକାର ହସ୍ତକଳା ଓ ଅଳଙ୍କାର ତିଆରି କରି ବିକିଥାନ୍ତି ଏହି ଗାଁର ବାସିନ୍ଦା । କେବଳ ମହିଳାଙ୍କ ଏହି ଗାଁକୁ ଦେଖିବାକୁ ବିଦେଶରୁ ଆସିଥାନ୍ତି ପର୍ଯ୍ୟଟକ । ଓମୁଜା ଅର୍ଥ ୟୂନିଟି । ମହିଳାଙ୍କ ଏହି ୟୂନିଟି ଗାଁକୁ ଦେଇଛି ନୂଆ ପରିଚୟ । ପର୍ଯ୍ୟଟକଙ୍କ ଆଗମନ ଓ ସେମାନଙ୍କୁ ହସ୍ତକଳା ବିକି ଓମୁଜାର ଅନ୍ତେବାସୀ ନିଜର ପ୍ରତିପୋଷଣ କରନ୍ତି । ବିଗତ ୨୦ ବର୍ଷ ଭିତରେ ଏହି ଗାଁକୁ ପଶି ଆସିଥିବା ଦୁଇ ପୁରୁଷଙ୍କୁ ଦଣ୍ଡ ଦିଆଯାଇଛି । ସେମାନଙ୍କୁ ଲୁଚାଇ ରଖିଥିବା ଅପରାଧରେ ଦୁଇ ମହିଳାଙ୍କୁ ଗାଁରୁ ବାହାର ରାସ୍ତା ଦେଖାଇ ଦିଆଯାଇଛି । ଏହା ବିଶ୍ୱର ପ୍ରଥମ ଗାଁ ,ଯେଉଁଠି ପୁରୁଷଙ୍କୁ ବାଦ ଦେଇ ଗାଁ ଗଢି ଉଠିଛି ।