ବାଲିଯାତ୍ରାରେ ଉପହାର ସାମଗ୍ରୀର ସୁନ୍ଦର ଏକ ଷ୍ଟଲ ଭିଡ଼ ଭିତରେ ବାରି ହୋଇପଡୁଥିଲା । ଏହା ଥିଲା କଟକର ଲିପ୍ସା ବେହୁରାଙ୍କର । ଐତିହ୍ୟ ବାଲିଯାତ୍ରାର ଆଗନ୍ତୁକ ଲିପ୍ସାଙ୍କ ଷ୍ଟଲ ଆଗରେ ଅଟକି ରହୁଥିଲେ । ବର୍ଜ୍ୟ ସାମଗ୍ରୀର ବ୍ୟବହାର କରି ଲିପ୍ସା ଆଖି ଖୋସିହୋଇଗଲା ଭଳି ସୁନ୍ଦର ସୁନ୍ଦର ଉପକରଣ ଏହି ଷ୍ଟଲରେ ଗଦେଇ ଥିବାରୁ ଏହା ପର୍ଯ୍ୟଟକଙ୍କ ଦୃଷ୍ଟି ଆକର୍ଷଣ କରୁଥିଲା । ଶ୍ରୀ ବିଶ୍ୱବିଦ୍ୟାଳୟରେ ଏମବିଏ କରିଥିବା ଲିପ୍ସା ରଦିକାଗଜ ,କାର୍ଡ ବୋର୍ଡ ,କାର୍ଟେନ,ନଡ଼ିଆ ଖୋଳ,ଭଙ୍ଗା ପ୍ଲାଷ୍ଟିକ ବୋତଲ ଓ ସୋଲ ଖଣ୍ଡ ବ୍ୟବହାର କରି କଣ୍ଢେଇ ,ବ୍ୟବହାର୍ଯ୍ୟ ସାମଗ୍ରୀ ତିଆରି କରିବା ସହିତ ବିକ୍ରି କରି ବେଶ ଦୁଇପଇସା ରୋଜଗାର କରୁଛନ୍ତି । ଲିପ୍ସା ଏଥିପାଇଁ BEYOND WASTE ନାଁରେ ଏକ ଷ୍ଟୋର ଖୋଲିବା ସହିତ ନିଜର ବ୍ରାଣ୍ଡ ଇମେଜ ସୃଷ୍ଟି କରିଛନ୍ତି ।
ଲିପ୍ସା ଏମ ବି ଏ ଡିଗ୍ରୀ ହାସଲ କରିବା ସହିତ ବ୍ୟବସାୟରେ ମଧ୍ୟ ଅଭିଜ୍ଞତା ହାସଲ କରିଛନ୍ତି । ଅଳିଆ ସୃଷ୍ଟି କରୁଥିବା ସାମଗ୍ରୀକୁ ବ୍ୟବହାର କରି ସେ ନିଜର ଆର୍ଥିକ ସ୍ଥିତିରେ ପରିବର୍ତ୍ତନ ଆଣିବା ପାଇଁ ପ୍ରୟାସ କରୁଛନ୍ତି । ଇକୋ ଫ୍ରେଣ୍ଡଲି ଉପହାର ସାମଗ୍ରୀ ଉତ୍ପାଦନରେ ତାଙ୍କର ଷ୍ଟୋର ଅଗ୍ରଣୀ ରହିଛି । କାର୍ଡବୋର୍ଡରୁ ଦେଶୀ କଣ୍ଢେଇ ସହିତ ଭଙ୍ଗା ପ୍ଲାଷ୍ଟିକ ବୋତଲରେ ସୁନ୍ଦର ଆର୍ଟ କରି ବଜାରରେ ନୂଆ ଚାହିଦା ଓ ଗ୍ରାହକ ସୃଷ୍ଟି କରିଛନ୍ତି । ଉପହାର ସାମଗ୍ରୀ କ୍ଷେତ୍ରରେ ନିଜର ପ୍ରବେଶକୁ ନେଇ ଲିପ୍ସା କହନ୍ତି ଅଧିକାଂଶ ସାମଗ୍ରୀ ପ୍ଲାଷ୍ଟିକ ଓ ସିନ୍ଥେଟିକ । ଏହା ପରିବେଶର କ୍ଷତି ସହିତ ଅଧିକ ଦାମୀ । ଶସ୍ତାରେ ପରିବେଶକୁ ସୁହାଇଲା ଭଳି ପ୍ରଡକ୍ଟ ଜରିଆରେ ଲିପ୍ସା ନିଜର ସ୍ଥିତି ଦୃଢ କରିଛନ୍ତି ।