ଗାଁରେ ଗଢାଯାଇଛି ସ୍ୱୟଂ ସହାୟକ ଦଳ । ଏକାଧିକ ସ୍ୱୟଂ ସହାୟକ ଦଳକୁ ନେଇ ଗଢାଯାଇଛି କୃଷି ଉତ୍ପାଦିକା ଗୋଷ୍ଠୀ । ଦଳ ଗୁଡିକୁ ତାଲିମ ,ପରିଦର୍ଶନ ଓ ବୈଷୟିକ ମାର୍ଗଦର୍ଶନ ସହିତ ଆନୁସଙ୍ଗିକ ସୁବିଧା ସୁଯୋଗ ଦେଇ ରୋଜଗାର ଦିଗରେ ସମର୍ଥ କରାଇଛି ସାମାଜିକ ସଂଗଠନ ହର୍ଷ ଟ୍ରଷ୍ଟ । ହର୍ଷ ଟ୍ରଷ୍ଟ ଉଦ୍ୟମ ଫଳରେ ଓଡିଶା ଓ ମଧ୍ୟପ୍ରଦେଶର ୨ ଲକ୍ଷରୁ ଅଧିକ ପରିବାରର ରୋଜଗାର ବଢିଛି ।
କୃଷି ଉତ୍ପାଦିକା ଦଳର ସଦସ୍ୟା ମାନେ ଦଳଗତ ଭାବେ ଅମଳ କରୁଛନ୍ତି ଲଙ୍କା । ଧାଡିକୁ ଧାଡି ଲାଗିଥିବା ଲଙ୍କା ଗଛରେ ଏବେ ଫଳ ଭର୍ତ୍ତି । ଠିକ ଦେଖାରଖା ହୋଇଥିବାରୁ ଭଲ ବଢିଛି ଗଛ । ବଜାରରେ ଲଙ୍କାର ଦର ଭଲ ଥିବାରୁ ଉତ୍ସାହିତ ଚାଷୀ । ପୂର୍ବଠାରୁ ଦୁଇଗୁଣା ଅଧିକ ଆୟ କରୁଛି କୋରାପୁଟର ଆଦିବାସୀ ମହିଳା । କେବଳ ଲଙ୍କା ନୁହଁ କୋରାପୁଟର ଜିଲ୍ଲାର ବୋରିଗୁମ୍ମା ସମେତ ୧୩ଟି ବ୍ଲକରେ ଶହ ଶହ ଏକର ଜମିରେ କରାଯାଇଛି ବାଇଗଣ ଭେଣ୍ଡି,କଲରା ,କାଙ୍କଡ଼ ,ବିନ୍ସ,ପୋଟଳ ଆଉ କୋବି । ଗରିବ ଚାଷୀଙ୍କ ମୁହଁରେ ହସ ଭରିବା ପାଇଁ ଏଭଳି ଉଦ୍ୟମ କରି ସଫଳ ହୋଇଛି ସାମାଜିକ ସଂଗଠନ ହର୍ଷ ଟ୍ରଷ୍ଟ ।
ଅବହେଳିତ ଓ ଉପେକ୍ଷିତ ଗରିବ ବର୍ଗର ଲୋକଙ୍କ ଆୟ ବୃଦ୍ଧି କରି ଜୀବନଧାରଣର ମାନ ବୃଦ୍ଧି କରିବା ଲକ୍ଷ୍ୟରେ କେବଳ ବୋରିଗୁମ୍ମା ବ୍ଲକର ୩୧ ପଂଚାୟତ ମଧ୍ୟରୁ ୨୬ ପଞ୍ଚାୟତରେ କାମ କରୁଛି ହର୍ଷଟ୍ରଷ୍ଟ । କୃଷି ଭିତ୍ତିଭୂମିର ଉନ୍ନତି , ଅଧିକ ଅମଳର ନିଶ୍ଚିତତା ସହିତ ବଜାର ସଂଯୋଗରେ ସୁବିଧା ପାଇଁ ଟ୍ରଷ୍ଟ ପକ୍ଷରୁ ନିଆଯାଇଛି କ୍ଲଷ୍ଟର ଆପ୍ରୋଚ । ୪ଟି ଉତ୍ପାଦିକା ଦଳ ଗଢ଼ାଯିବା ସହିତ ୩୪୫ ଏକର ଜମିରେ ବ୍ୟାପକ ଭାବରେ ହେଉଛି ପରିବା ଉତ୍ପାଦନ । ଏବେ ପରିବା ଚାଷର ଆୟରେ ପରିବାରର ସ୍ଥିତି ବଦଳିଛି । ଗାଁରେ ନିରନ୍ତର ଆୟ ମିଳିବା ସମ୍ଭବ ହୋଇଛି ଓ ଫସଲ ଆୟରେ ଚଳୁଛି ଘର । ଓଡିଶା ଓ ମଧ୍ୟପ୍ରଦେଶର ୧୮ଜିଲ୍ଲା ୭୬ ବ୍ଲକରେ ୩ହଜାରରୁ ଅଧିକ ଗାଁରେ କାମ କରୁଛି ହର୍ଷ ଟ୍ରଷ୍ଟ । ଲୋକଙ୍କ ଜୀବନ ଧାରଣର ମାନରେ ଉନ୍ନତି ପାଇଁ ଏସବୁ ଗାଁରେ ଗଢାଯାଇଛି ୬ହଜାରରୁ ଅଧିକ ମହିଳା ଏସ ଏଚ ଜି । ଜୀବିକା ମଡେଲ ,ଲକ୍ଷପତି ମଡେଲ ,ମିଶ୍ରିତ କୃଷି ,ବୁନ୍ଦା ଜଳସେଚନ ,ପଶୁ ପାଳନ ଓ କୃଷିରେ ନବସୃଜନକୁ ମାଧ୍ୟମ କରି ଟ୍ରଷ୍ଟ ଗ୍ରାମୀଣ କୃଷି ଅର୍ଥନୀତିରେ ପ୍ରମୁଖ ଯୋଗଦାନ ଦେଇଛି । ହର୍ଷଟ୍ରଷ୍ଟର ସହ ପ୍ରତିଷ୍ଠାତା ବିସ୍ମୟ ମହାମାତ୍ର କର୍ପୋରେଟ ଚାକିରୀକୁ ଅଳବିଦା କହି ଦୁର୍ବଳ ଲୋକଙ୍କ ସେବା ପାଇଁ ବାଛିଛନ୍ତି ଗାଁକୁ । ତାଙ୍କରି ପ୍ରେରଣା ଓ ମାର୍ଗଦର୍ଶନ ରେ ଆଜି ଏହି ସଂଗଠନ ଦକ୍ଷିଣ ଓଡିଶାରେ ପରିବା ଉତ୍ପାଦନରେ ଏକ ପ୍ରମୁଖ ସ୍ଥାନ ନେଇଛି । ଜାଭିୟର ଇନଷ୍ଟିଟ୍ୟୁଟ ଅଫ ମ୍ୟାନେଜମେଣ୍ଟରୁ ପାସ ଆଉଟ ବିସ୍ମୟ ବଡ଼ ପ୍ୟାକେଜର ଚାକିରୀ ଛାଡି ହର୍ଷ ଟ୍ରଷ୍ଟ ଗଢିବା ସହିତ କର୍ପସ ଫଣ୍ଡ ପାଇଁ ଦେଇଛନ୍ତି ୧୦ ଲକ୍ଷ ଟଙ୍କାର ନିଜସ୍ୱ ଅବଦାନ । ଲୋକଙ୍କ ପାଇଁ କିଛି କରିବାର ମାନସିକତା ଥିବା ଉଚ୍ଚ ଶିକ୍ଷିତ ୪୦୦ ଯୁବାଙ୍କୁ ଟ୍ରଷ୍ଟ ପକ୍ଷରୁ ନିଯୁକ୍ତି ପ୍ରଦାନ କରାଯାଇଛି । ଭିଟାମାଟି ଛାଡି କାମ ଖୋଜିବାକୁ ବାହାରକୁ ପଳାୟନ କରୁଥିବା ଲୋକଙ୍କୁ ଗାଁରେ କାମ ଦେବାରେ ହର୍ଷଟ୍ରଷ୍ଟ ଅଣ୍ଟା ଭିଡିଛି ।