ହରିୟାଣାର ଝିଅ ଶ୍ରମିଳା ଯାଦବ । ପିଲାଟି ଦିନରୁ ଦେଖୁଥିଲେ ପାଇଲଟ ହେବାର ସ୍ବପ୍ନ । ଏବେ ସେ ବିମାନ ସିନା ଉଡାଇ ପାରିଲେ ନାହିଁ ,କିନ୍ତୁ ଆକାଶରେ ଡ୍ରୋନ ଉଡାଇ କୃଷକଙ୍କ ଆଖିରେ ଭରିଛନ୍ତି ଆସ୍ୱସ୍ଥିର ଆଲୁଅ । ଅନ୍ୟ ୩୦୦ ମହିଳାଙ୍କ ସହିତ ତାଙ୍କୁ ଦେଶର ଅନ୍ୟତମ ପ୍ରମୁଖ ସାର ଉତ୍ପାଦନ କମ୍ପାନୀ ଇଫକୋ ଡ୍ରୋନ ଉଡ଼ାଇବାର ତାଲିମ ପ୍ରଦାନ କରିଥିଲା । କେନ୍ଦ୍ର ସରକାରଙ୍କ ଡ୍ରୋନ ଦିଦି କାର୍ଯ୍ୟକ୍ରମର ଏହା ଥିଲା ଏକ ଅଂଶ । ତାଲିମ ପରେ ପ୍ରତ୍ୟେକଙ୍କୁ ୩୦ କେଜି ଓଜନର ଏକ ଡ୍ରୋନ ସହିତ କ୍ଷେତ ପର୍ଯ୍ୟନ୍ତ ପରିବହନ ପାଇଁ ଏକ ଚକ ଲଗା ଠେଲା ଗାଡି ପ୍ରଦାନ କରାଯାଇଥିଲା । ସେ ଆକାଶରେ ସିନା ଉଡାଣ ଭରି ପାରିଲେ ନାହିଁ । କିନ୍ତୁ ଗରିବ ଚାଷୀଙ୍କୁ କମ ଖର୍ଚ୍ଚରେ ସାର ଓ କୀଟନାଶକ ସିଞ୍ଚନରେ ସହାୟତା କରି ସ୍ୱପ୍ନରେ ଯୋଡ଼ିପାରିଲେ ଡେଣା ।
ଚାଷ ଜମିରେ ମାନବ ସମ୍ବଳ ନିୟୋଜନ ହ୍ରାସ ଓ କମ ଖର୍ଚ୍ଚରେ ସମୟ ସଂଚୟ ସହିତ ପ୍ରଭାବୀ ଢଙ୍ଗରେ କାର୍ଯ୍ୟ କରୁଛି ଏହି ପ୍ରଯୁକ୍ତି । ଶର୍ମିଲା ୧୫୦ ଏକର ଜମିରେ ୫ ସପ୍ତାହରେ ଦୁଇଥର ସ୍ପ୍ରେ କରି ୫୦ ହଜାର ଟଙ୍କା ରୋଜଗାର କରୁଛନ୍ତି । ଏହା ତାଙ୍କର ରୋଜଗାରର କେବଳ ଏକ ମାଧ୍ୟମ ନୁହଁ ବରଂ ସମ୍ମାନ ଦେବାର ଏକ ଉତ୍ସ । ଶର୍ମିଲା କହନ୍ତି ଲୋକେ ଯେତେବେଳେ ମୋତେ ପାଇଲଟ କହି ସମ୍ବୋଧନ କରନ୍ତି ସେତେବେଳେ ମୋତେ ବହୁତ ଖୁସି ଅନୁଭବ ହୁଏ । ସ୍ୱପ୍ନର ନିକଟତର ହୋଇଥିବାର ଗର୍ବ ଆସେ । ଚାଷୀଙ୍କ ସେବା ସହିତ ରୋଜଗାର କରିବାର ଦ୍ୱେତ ଲାଭ ଏଥିରୁ ମିଳେ । ସରକାରଙ୍କ ଏହି ଯୋଜନା କୃଷିର ଉନ୍ନତି ,ଚାଷୀଙ୍କ ସମୃଦ୍ଧି ,ଜଳ ଓ ସମୟର ସଂଚୟ ସହିତ ନାରୀ ସଶକ୍ତିକରଣର ପ୍ରଭାବୀ ମାଧ୍ୟମ ।