ପିଲାଦିନେ ସେ ବାପାଙ୍କୁ ହୋଟେଲରେ ସାହାଯ୍ୟ କରିବା ପାଇଁ ଅଟା ଦଳୁଥିଲେ । ବଡ଼ ହେବା ପରେ ସେ ନିଜର ଏକ ହର୍ବାଲ ଟି ବ୍ୟବସାୟ କରି ଭଲ ରୋଜଗାର ସହିତ ପାଲଟିଛନ୍ତି ନିଯୁକ୍ତିଦାତା । ମଣିପୁର ନାଗାଲାଣ୍ଡ ଠାରୁ ବାଙ୍ଗାଲୁର ହାଇଦ୍ରାବାଦ ଯାଏଁ ସବୁଠି ତାଙ୍କର ଚା ଗ୍ରାହକଙ୍କୁ ଦେଇଛି ଉଷ୍ମ ଅନୁଭବ । କିନ୍ତୁ ଏତିକିରେ ସରିନାହିଁ ତାଙ୍କର ସ୍ବପ୍ନ ।
ମଣିପୁରର ଝିଅ ପେମରୀଓନଙ୍କୁ ଯେତେବେଳେ ୬ ବର୍ଷ ବୟସ ସେତେବେଳୁ ସେ ନିଜ ଅଭିଭାବକଙ୍କ ଦ୍ୱାରା ପରିଚାଳିତ ହୋଟଲରେ ବସୁଥିଲେ । ୯ ଭାଇ ଭଉଣୀଙ୍କ ମଧ୍ୟରୁ ୬ ନମ୍ବର ଥିଲେ ପେମରୀଓନ । ନିମ୍ନ ମଧ୍ୟବିତ୍ତ ପରିବାରକୁ ଚଳାଇବା ପାଇଁ ତାଙ୍କ ବାପା ପୁରୀ ସହିତ ଚା ପ୍ରସ୍ତୁତ କରି ଗ୍ରାହକଙ୍କୁ ପରଷୁଥିଲେ । ଅଟା ଦଳିବା ଓ ଚା ତିଆରିକୁ ପାଖରୁ ଦେଖି ଦେଖି ସେ ଏହାର ପ୍ରସ୍ତୁତି ଜାଣିବା ସହିତ ବ୍ୟବସାୟ ପ୍ରତି ଆକର୍ଷିତ ହୋଇଥିଲେ । ପାଠ ପଢିବା ସହିତ ସେ ନିଜ ଅଂଚଳର ଚାହିଦା ବାବଦରେ ଜାଣିବାକୁ ପାଇଲେ । ମଣିପୁରର ଲୋକେ କେକ ଓ ପାଷ୍ଟ୍ରି ଅଧିକ ଖାଇବାକୁ ଇଛା କରିଥିବା ଜାଣିବା ପରେ ସେ ଜିଲ୍ଲା ସଦର ମହକୁମା ଭଖରୁଲୁ କୃଷି ବିଜ୍ଞାନ କେନ୍ଦ୍ରରୁ ତାଲିମ ନେବା ସହିତ ୧୬ ହଜାର ଟଙ୍କାରେ ଛୋଟ ଏକ ଓଭାନ କିଣି କେକ ,ପାଷ୍ଟ୍ରିର ବ୍ୟବସାୟ କଲେ । କେକ ସ୍ୱାଦିଷ୍ଟ ଥିବାରୁ ଚାହିଦା ବଢ଼ିଲା । ବିପୁଳ ପରିମାଣର ଅର୍ଡର ମିଳିବାରୁ ସେ ବଡ଼ ଓଭାନ ସହିତ ଅଧିକ କର୍ମଚାରୀଙ୍କୁ ରଖି ଆରମ୍ଭ କଲେ ଘରେ ପହଞ୍ଚାଇବାର ସେବା ।
କରୋନା ସମୟରେ ସେ ସ୍ବେଛାସେବୀ ଭାବେ ସେବା କରିବା ସହିତ ହର୍ବାଲ ଟି ପ୍ରସ୍ତୁତ କରି ଵିତରିତ କରୁଥିଲେ । ହଳଦୀ ,ଶୁଣ୍ଠୀ,ଗୋଲମରିଚ ,ତେଜପତ୍ର ,ଡାଳିମ୍ବ ପତ୍ର ,ଭୁରୁସୁଙ୍ଗା ପତ୍ର ,ପୋଦିନା ପତ୍ର କୁ ଗୁଣ୍ଡକରି ସେ ପ୍ରସ୍ତୁତ କରୁଥିବା ହର୍ବାଲ ଚା ଡିମାଣ୍ଡ ବଢ଼ିଲା । ୱାର୍ମ ଡିଲାଇଟ ଓ ଗାର୍ଡେନ ଅଫ ଇଡେନ ନାଁରେ ସେ ଦୁଇ ପ୍ରକାର ହର୍ବାଲ ଟିର ବ୍ୟବସାୟ ଆରମ୍ଭ କଲେ । ଏବେ ୧୦୦ ଗ୍ରାମ ହର୍ବାଲ ଟି ର ଗୋଟିଏ ପ୍ୟାକେଟକୁ ୨୫୦ ଟଙ୍କାରେ ବିକ୍ରି କରିବାରେ ସଫଳ ହୋଇଛନ୍ତି ।