ଋତୁକାଳୀନ ବ୍ୟବସାୟ ଭରିଛି ଆତ୍ମବିଶ୍ୱାସ । ପର୍ବ ଓ ପରମ୍ପରାରୁ ଖୁସି ସହିତ ମିଳୁଛି ଆୟ । ଖୋର୍ଦ୍ଧା ଜିଲ୍ଲା ଜଙ୍କିଆ ଅଂଚଳର ଏସଏଚଜି ସଦସ୍ୟା ରାକ୍ଷୀ ତିଆରି ଜରିଆରେ ହୋଇଛନ୍ତି ସ୍ଵ ରୋଜଗାରୀ । ଅନିମା ସାମନ୍ତରାୟଙ୍କ ମାର୍ଗଦର୍ଶନ ଓ ପ୍ରଶିକ୍ଷଣ ପରେ ମହିଳା ମାନେ ଘରକାମ ସରିବା ପରେ ବାଛିଛନ୍ତି ରାକ୍ଷୀ ତିଆରିର ବୃତ୍ତି । ରାକ୍ଷୀ ପୂର୍ଣ୍ଣିମାର ଦୁଇ ତିନିମାସ ପୂର୍ବରୁ କିଣାଯାଇଥାଏ ଆବଶ୍ୟକୀୟ କଞ୍ଚାମାଲ । ରାକ୍ଷୀରେ ବ୍ୟବହୃତ ସୁତା ଷ୍ଟୋନ ,ଚୁମକି,ଧାନ ,କଉଡ଼ି,କାଇଁଚ ,ଶଙ୍ଖ ଆଦି ସାମଗ୍ରୀ କଟକ ଓ ଜଟଣୀରୁ କିଣି ଆଣୁଥିଲେ । ଏବେ ବ୍ୟବସାୟ ବଢ଼ୁଥିବାରୁ ଅଧିକ ସାମଗ୍ରୀ କିଣିବାକୁ ପଡୁଛି । ପୁଣି ଓଡିଶା ବଜାର ଅପେକ୍ଷା ଶସ୍ତା ହେଉଥିବାରୁ ଚଳିତ ବର୍ଷ କିଣାଯାଇଛି କୋଲକାତାରୁ । ବିଗତ ତିନିମାସ ଧରି ତିଆରି ଚାଲିଛି ରାକ୍ଷୀ । ଦଳର ୧୬ ଜଣ ସଦସ୍ୟା ଯୋଜନା ମୁତାବିକ ଲାଗିଛନ୍ତି ନିଜ ନିଜ କାମରେ ।
ବଜାର ଚାହିଦା ଅନୁଯାୟୀ ତିଆରି ହେଉଛି ସାମଗ୍ରୀ । ପ୍ରକୃତିରୁ ମିଳୁଥିବା କାଇଁଚ,ମଞ୍ଜି ,ଧାନ ଓ କଉଡ଼ି ତିଆରି ରାକ୍ଷୀ ପ୍ରତି ରହିଛି ଗ୍ରାହକଙ୍କ ରୁଚି । କମମୂଲ୍ୟ ଓ ଅଧିକ ସୁନ୍ଦରର ପ୍ରସ୍ତୁତି ଉପରେ ଦିଆଯାଉଛି ଗୁରୁତ୍ୱ । ଉଭୟ ଗ୍ରାମାଞ୍ଚଳ ଓ ସହର ଗୁଡିକରେ ଅଧିକ ଚାହିଦା ରହିଛି ଧାନ ସାଙ୍ଗକୁ ଜଗନ୍ନାଥ ରାକ୍ଷୀ । ବର୍ତ୍ତମାନ ସୁଧା ୧୫ ହଜାରରୁ ଅଧିକ ଜଗନ୍ନାଥ ରାକ୍ଷୀ ତିଆରି ସରିଛି । ସବୁ ଡିଜାଇନ ମିଶି ତିଆରି ହୋଇଛି ଲକ୍ଷାଧିକ ରାକ୍ଷୀ । ତିଆରି ପରେ ଏବେ ଏସବୁ ପ୍ୟାକ ହେଉଛି । ରାକ୍ଷୀ ପୂର୍ଣ୍ଣିମା ପାଖେଇ ଆସୁଥିବା ବେଳେ କାମ ସବୁ ଏବେ ସରିବା ଉପରେ । ଘର ନିକଟରେ ସାମୟିକ ପରିଶ୍ରମ ବିନିମୟରେ ରୋଜଗାର ଦେଉଛି ଏସବୁ କାମ । ଆଗକୁ ବ୍ୟବସାୟ ଅଧିକ ବଢିବ ଓ ମହିଳାଙ୍କ ଆୟ ମଧ୍ୟ ବଢିବ ବୋଲି କହିଛନ୍ତି ଦଳର ନେତ୍ରୀ ଅନିମା ସାମନ୍ତରାୟ ।