ରାକ୍ଷୀ ପୂର୍ଣ୍ଣିମା ଆସିଲେ ବଜାରକୁ ଆସିଥାଏ ଭଳିକି ଭଳି ରଙ୍ଗ ,ଆକାର ଓ ଡିଜାଇନର ରାକ୍ଷୀ । ପ୍ରତିବର୍ଷ ନୂଆ ନୂଆ ଡିଜାଇନର ରାକ୍ଷୀ ବଜାରକୁ ଆସୁଥିବା ବେଳେ ଚଳିତ ବର୍ଷ ଟ୍ରେଣ୍ଡରେ ରହିଛି ଚକୋଲେଟ ରାକ୍ଷୀ । ବିଭିନ୍ନ ଫ୍ଲେବରର ଚକୋଲେଟ ରାକ୍ଷୀ ଏବେ ତିଆରି ହୋଇ ବଜାରକୁ ଆସିଛି । ଦିନେ ବ୍ୟବହାର ପରେ ଫିଙ୍ଗି ଦିଆଯାଉଥିବା ରାକ୍ଷୀ ଏବେ ଏହାର ସ୍ୱତନ୍ତ୍ରତା ପାଇଁ ସାଇତା ରଖାଯିବା ସହିତ କରାଯାଉଛି ବ୍ୟବହାର । ସେହି ଦୃଷ୍ଟିରୁ ବଢିଛି ଚକୋଲେଟ ରାକ୍ଷୀ ପାଇଁ ଚାହିଦା । ଏହି ରାକ୍ଷୀରେ ବ୍ୟବହୃତ ହୋଇଥିବା ଚକଲେଟର ସ୍ୱାଦ ମଧ୍ୟ ସ୍ୱତନ୍ତ୍ର । କାହାର ସ୍ୱାଦ ପାନର ସ୍ୱାଦ ଦେଉଥିବା ବେଳେ ଆଉ କାହାର ସ୍ୱାଦ ଷ୍ଟ୍ରବେରି ଭଳି । ଗୋଲାପ,ମ୍ୟାଙ୍ଗୋ, ଡ୍ରାଏଫ୍ରୁଟ ,ନଡ଼ିଆ, ଓ ଭାନିଲା ଭଳି ଫ୍ଲେବରର ଫୁଲ ରାକ୍ଷୀ ମିଳୁଛି । ଏହାର ଦାମ ରହିଛି ୫୦ ଟଙ୍କାରୁ ନେଇ ଦେଢ଼ଶହ ଟଙ୍କା ଯାଏଁ । ଉଭୟ ଅନଲାଇନ ଓ ଅଫ ଲାଇନରେ ମିଳୁଛି ଏହି ରାକ୍ଷୀ । ଛୋଟ ପିଲାଙ୍କୁ ଏହି ରାକ୍ଷୀ ବେଶ ଆକୃଷ୍ଟ କରିବ ବୋଲି କହିଛନ୍ତି ଏହାର ଡିଜାଇନର ପ୍ରିୟଦର୍ଶିନୀ ଦାସ । ଭୁବନେଶ୍ୱର ପଟିଆ ଅଂଚଳରେ ରହୁଥିବା ପ୍ରିୟଦର୍ଶନୀ ଇକୋ ଦର୍ଶନୀ ନାମରେ ଏକ ସଂଗଠନ ଗଢି ପରିବେଶ ଅନୁକୂଳ ରାକ୍ଷୀ ତିଆରି ସହିତ ବସ୍ତିରେ ଦେଉଛନ୍ତି ତାଲିମ ।
ପିଲା ଓ ବୟସ୍କ ସଭିଙ୍କୁ ପସନ୍ଦ ଚକୋଲେଟ । ପୁଣି ବଜାରରେ ମିଳୁଥିବା ମିଠାରେ ଅପମିଶ୍ରଣ ହେଉଥିବାରୁ ଏବଂ ବହୁମୁତ୍ର ରୋଗୀଙ୍କ ସଂଖ୍ୟା ବଢ଼ୁଥିବାରୁ ମିଠା ପ୍ରତି ଏବେ କମିଛି ଆଗ୍ରହ । ଏଭଳି ସ୍ଥିତିରେ ରାକ୍ଷୀ ସହିତ ମିଠାକୁ ଯୋଡି ନୂଆ ଚକୋଲେଟ ରାକ୍ଷୀ ତିଆରି କରିଛନ୍ତି ପ୍ରିୟଦର୍ଶିନୀ । କେବଳ ମିଠା ନୁହଁ ପରିବେଶ ପାଇଁ ବେଶ ଅନୁକୂଳ ରାକ୍ଷୀ ମଧ୍ୟ ସେ ତିଆରି କରୁଛନ୍ତି । ସହଜରେ ଜୈବ ବିଘଟନ ହୋଇପାରୁଥିବା ବିଭିନ୍ନ ପ୍ରକାର ମଞ୍ଜି ,ତୁଳସୀ କାଠି , କାଇଁଚ ,ବେଲ କାଠି,ବୈଜୟନ୍ତୀ ଓ ରୁଦ୍ରାକ୍ଷକୁ ବ୍ୟବହାର କରି ତିଆରି ହୋଇଛି ସୁନ୍ଦର ଓ ଆକର୍ଷଣୀୟ ରାକ୍ଷୀ । ଭାରତୀୟ ପର୍ବପର୍ବାଣିର ମହତ୍ୱ ପ୍ରତିପାଦିତ କରିବା ସହିତ ଏସବୁ ରାକ୍ଷୀ ଉଚିତ ମୂଲ୍ୟରେ ବଜାରରେ ଉପଲବ୍ଧ ହେଉଛି ।