ଅଦରକାରୀ ବୋତଲରେ ସୁନ୍ଦର କ୍ରାଫ୍ଟ । ସୃଷ୍ଟି କରିଛି ରୋଜଗାରର ଭଲ ମାଧ୍ୟମ । ବ୍ୟବହୃତ ବୋତଲ ସଂଗ୍ରହ କରି ସଫା ହେବା ପରେ ସେଥିରେ ଅଠା ଓ ରଙ୍ଗର ପ୍ରଲେପ ଦେଇ ଅଙ୍କା ଯାଇଛି ମନଲୋଭା ଚିତ୍ର । ଦେବାଦେବୀଙ୍କ ରୂପ ସହିତ କରାଯାଇଛି ବୃକ୍ଷଲତା ,ଫୁଲଫଳ ଓ ଅନ୍ୟାନ୍ୟ ପ୍ରାକୃତିକ ଦୃଶ୍ୟର ଚିତ୍ରଣ । ଯେଉଁ ବୋତଲ ଗୁଡିକ ଅଳିଆ ପାଲଟିଥାଆନ୍ତା ସେସବୁ ପାଲଟିଛି ଘର ସଜ୍ଜା ସାମଗ୍ରୀ । ଅବ୍ୟବହୃତ କାଚ ଓ ପ୍ଲାଷ୍ଟିକ ବୋତଲକୁ ସଂଗ୍ରହ କରି ନୂଆ ରୂପ ଦେଇଛନ୍ତି କେନ୍ଦ୍ରାପଡା ଜିଲ୍ଲା ଗୋପ ଗାଁର ତପସ୍ୱିନୀ ସେନାପତି । ତପସ୍ୱିନୀ ନିଜର ସୃଜନଶୀଳତା ଓ କୌଶଳ ଜରିଆରେ ସୁନ୍ଦର ବୋତଲ କ୍ରାଫ୍ଟ କରି ନୂଆ ଏକ ବ୍ୟବସାୟିକ ସମ୍ଭାବନା ସୃଷ୍ଟି କରିଛନ୍ତି । ତାଙ୍କର ଏହି ବୋତଲ କ୍ରାଫ୍ଟ କେବଳ ପରିବେଶ ସୁରକ୍ଷାରେ ସହାୟକ ନୁହେଁ ବରଂ ଏହା ତାଙ୍କୁ ଆର୍ଥିକ ସ୍ୱାବଲମ୍ବୀ କରିବାର ଆଶା ଦେଖାଇଛି । ଆତ୍ମ ବିଶ୍ୱାସର ନୂତନ ଉଚ୍ଚତା ଦେଇଛି । ତପସ୍ୱିନୀ ଏବେ ନିଜର ସନ୍ତାନଙ୍କ ଦାୟିତ୍ୱ ନେବା ସହିତ କ୍ରାଫ୍ଟ ଜରିଆରେ ନିଜର ଆଉ ଏକ ପରିଚୟ ସୃଷ୍ଟିରେ ମନଯୋଗ କରିଛନ୍ତି ।
ପିଲାଟି ଦିନରୁ ତପସ୍ୱିନୀଙ୍କ ରହିଛି କଳା ପ୍ରତି ଆଗ୍ରହ । କେବେ ଚିତ୍ର ତ କେବେ କଣ୍ଢେଇ ଗଢି ସେ ବଜାୟ ରଖିଛନ୍ତି ନିଜର ରୁଚି । ଚାକିରୀ ଓ ବିବାହ ପରେ ସେ ସମୟ ନ ପାଇ ଚିତ୍ରକଳା ଠାରୁ ସାମୟିକ ଭାବେ ଦୁରେଇ ଯାଇଥିଲେ କିନ୍ତୁ ଏବେ ସନ୍ତାନଙ୍କ ଦାୟିତ୍ୱ ପାଇଁ ଚାକିରୀ ଛାଡି ଘରେ ରହୁଥିବା ବେଳେ ଫାଙ୍କା ସମୟ ପାଇଥିବାରୁ ପୁଣି ଧରିଛନ୍ତି ତୁଳି । ବୋତଲ କ୍ରାଫ୍ଟ ସହିତ ସେ ମାଟିରେ ଗଢ଼ିଛନ୍ତି ନାନା ପ୍ରକାର ଫଳ ,ଖାଦ୍ୟ ସମ୍ଭାର ଓ କଣ୍ଢେଇ । ଏହା ଶିଶୁଙ୍କୁ ଆମୋଦିତ କରିବା ସହିତ ଦେଇପାରିବ ଶିକ୍ଷା । ବିଭିନ୍ନ ପ୍ରକାର ଷ୍ଟୋନ,ମିରର ,ଚୁମୁକି ସଂଗ୍ରହ କରି ସେ ନିଜର କାରିଗରୀ ଓ ଚିତ୍ରକଳାକୁ ନିଖୁଣ ରୂପ ଦେଇଛନ୍ତି ।