ଦେଶର ୭୯ ତମ ସ୍ୱାଧୀନତା ଦିବସ ମହାସମାରୋହରେ ପାଳିତ ହେଉଥିବା ବେଳେ ଐତିହାସିକ ଲାଲକିଲା ଉପରୁ ଦେଶବାସୀଙ୍କୁ ସମ୍ବୋଧିତ କରିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଦେଶର ଏହି ଗର୍ବର ମୁହୂର୍ତ୍ତକୁ ପ୍ରତ୍ୟକ୍ଷ କରିବା ପାଇଁ ସାରା ଦେଶରୁ ୭୦ ଲକ୍ଷପତି ଦିଦିଙ୍କୁ ଅତିଥି ଭାବେ ରକ୍ଷା ମନ୍ତ୍ରଣାଳୟ ପକ୍ଷରୁ ନିମନ୍ତ୍ରିତ କରାଯାଇଥିଲା । ଏହି କ୍ରମରେ ଉତ୍ତରପ୍ରଦେଶରୁ ୧୪ ଜଣ ଲକ୍ଷପତି ଦିଦିଙ୍କୁ ସ୍ୱାଧୀନତା ଦିବସ ପାଇଁ ଲାଲକିଲା କାର୍ଯ୍ୟକ୍ରମକୁ ନିମନ୍ତ୍ରିତ କରାଯାଇଥିଲା । ସବୁଠୁ ଅଧିକ ଲକ୍ଷପତି ଦିଦି ଉତ୍ତରପ୍ରଦେଶରୁ ପ୍ରତିନିଧିତ୍ବ କରିଥିଲେ ।
ଉତ୍ତରପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ନେତୃତ୍ୱରେ ସମ୍ପ୍ରତ୍ତି ରାଜ୍ୟର ମହିଳାମାନେ ଆର୍ଥିକ ,ସାମାଜିକ ,ଏବଂ ମାନସିକ ଭାବେ ସଶକ୍ତ ହେଉଛନ୍ତି । ଲକ୍ଷପତି ଦିଦି ଅଭିଯାନ ଗ୍ରାମୀଣ ଗରିବ ମାନଙ୍କୁ ସଶକ୍ତ ଉଦ୍ୟୋଗୀ ହେବାର ବାଟ ଦେଖାଇଛି । ସ୍ୱୟଂ ସହାୟକ ଦଳ ଗଢିବା ସହିତ ସରକାରୀ ଋଣ ,ରିହାତି ଓ ପ୍ରୋତ୍ସାହନ ପାଇ ସେମାନେ ନାନା ପ୍ରକାର ଆୟ ବୃଦ୍ଧିକାରି କାର୍ଯ୍ୟକ୍ରମ ସହିତ ଜଡିତ ଅଛନ୍ତି । ବ୍ୟକ୍ତିଗତ ଓ ସାମୁହିକ ବ୍ୟବସାୟ ସହିତ ସେମାନେ ଆଗକୁ ବଢୁଥିବା ବେଳେ କେତେ ମହିଳା କମ ସମୟ ମଧ୍ୟରେ ଢେର ଆଗକୁ ଯାଇଥିବାର ନଜିର ରହିଛି ।
ଯେଉଁ ମହିଳା ମାନେ ସ୍ୱୟଂ ସହାୟକ ଦଳ ଓ ସରକାରୀ ଋଣକୁ ଠିକ ବିନିଯୋଗ କରି ଲକ୍ଷପତି ହୋଇଛନ୍ତି ସେମାନଙ୍କ କାମକୁ ସାରା ଦେଶରେ ପହଂଚାଇବା ପାଇଁ ସେମାନଙ୍କୁ ଲାଲକିଲା ଉତ୍ସବକୁ ନିମନ୍ତ୍ରିତ କରାଯାଇଥିଲା । ସୂଚନା ଯୋଗ୍ୟଯେ ଉତ୍ତରପ୍ରଦେଶରେ ଲକ୍ଷଲକ୍ଷ ମହିଳା ସ୍ୱୟଂ ସହାୟକ ଦଳ ଗଢି ବ୍ୟକ୍ତିଗତ ଓ ଦଳଗତ ଭାବେ ଆଚାର ,ପାମ୍ପଡ଼ ,ମିକଶ୍ଚର ତିଆରି ଠାରୁ ଆରମ୍ଭ କରି ପେପର ପ୍ଲେଟ ତିଆରି ,ଫୁଲଫଳ ଚାଷ ,ଗୋପାଳନ ,ମହୁମାଛି ଚାଷ ,ମାଛଚାଷରେ ନିରବଛିନ୍ନ ପ୍ରୟାସ କରି ଆତ୍ମନିର୍ଭରତାରେ ନୂଆ କାହାଣୀ ତିଆରି କରିଛନ୍ତି ।