ଚେସ ଦୁନିଆରେ ଏକ ନୁଆଁ ନାଁ ର ଚମକ ଦେଖିଛି ବିଶ୍ୱ । ଏହି ନାଁ ହେଉଛି ଦିବ୍ୟା ଦେଶମୁଖ । ନିକଟରେ ଚେସରେ ଇତିହାସ ରଚିଛନ୍ତି ଦେଶମୁଖ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜଣାଇଛନ୍ତି ବଧାଇ । ଶତରଂଜର ଏହି ତାରକା ଦେଶ ପାଇଁ ଆଣିଛନ୍ତି ଗର୍ବ । ମହାରାଷ୍ଟ୍ର ନାଗପୁର ବାସିନ୍ଦା ୧୯ ବର୍ଷର ଦିବ୍ୟା ୨୦୨୫ FIDE ମହିଳା ବିଶ୍ୱକପ ବିଜୟୀ ହୋଇଛନ୍ତି । ଗ୍ରାଣ୍ଡ ମାଷ୍ଟର ଟାଇଟଲ ହାସଲ କରି ନିଜ ପ୍ରତିଭାର କରିଛନ୍ତି ପ୍ରଦର୍ଶନ । ତେବେ ସେ ଆଉ କାହାକୁ ନୁହଁ ,ଭାରତର ଅନନ୍ୟ କ୍ରୀଡା ପ୍ରତିଭା କୋନେରୁ ହମ୍ପିଙ୍କୁ ଟାଇ -ବ୍ରେକରେ ପରାଜିତ କରିଛନ୍ତି । ଦିବ୍ୟା ଗତବର୍ଷ ବିଶ୍ୱ ଜୁନିୟର ଚାମ୍ପିୟନସିପ ଜିତିଥିଲେ । ୨୦୨୪ରେ ବୁଦାପେଷ୍ଟ ଠାରେ ଆୟୋଜିତ ଚେସ ଅଲମ୍ପିଆଡରେ ଭାରତକୁ ସ୍ଵର୍ଣ୍ଣପଦକ ବିଜୟୀ ହେବାରେ ବଡ଼ ଭୂମିକା ନିର୍ବାହ କରିଥିଲେ । କିନ୍ତୁ ତାଙ୍କର ଏହି ଐତିହାସିକ ସଫଳତା ପଛରେ ଯାହାଙ୍କ ଭୂମିକା ଥିବା କୁହାଯାଉଛି ସେ ହେଉଛନ୍ତି ଦିବ୍ୟାଙ୍କ ମା । ଦିବ୍ୟା କହିଛନ୍ତି ଚେସ ଖେଳୁଥିବା ବେଳେ ମୋ ମା ନୀରବରେ ଘଣ୍ଟା ଘଣ୍ଟା ଧରି ମୋ ପାଖରେ ଠିଆ ହୋଇ ସମର୍ଥନ ଦେଇଛନ୍ତି । ଟାଇଟଲ ଜିତିବା ପରେ ଦିବ୍ୟା ତାଙ୍କ ମାଙ୍କୁ କୁଣ୍ଢାଇ ଖୁସିର ଅଶ୍ରୁ ନିଗାଡ଼ି ଥିଲେ । ଏହାର ଏକ ଫଟୋ ନିଜ ସୋସିଆଲ ମିଡ଼ିଆ ହ୍ୟାଣ୍ଡଳରେ ପୋଷ୍ଟ କରି ଶିଳ୍ପପତି ଆନନ୍ଦ ମହିନ୍ଦ୍ରା ସଫଳ ବ୍ୟକ୍ତିଙ୍କ ପଛରେ ଆଉ ଏକ ସଫଳ କାହାଣୀ ଲୁଚି ରହିଥିବା କହିଛନ୍ତି । ଦିବ୍ୟା ଙ୍କୁ ଏତେ ଉଚ୍ଚତାରେ ପହଞ୍ଚାଇଥିବାରୁ ଅନେକ ଦର୍ଶକ ଦିବ୍ୟାଙ୍କ ମାଙ୍କୁ ପ୍ରସଂଶା କରିଛନ୍ତି ।