ଜୀବିକାକୁ ସମୃଦ୍ଧ କରିବ ପଦ୍ମଫୁଲ । ରାଜ୍ୟରେ ରହିଛି ଏହାର ବିପୁଳ ବ୍ୟବସାୟିକ ସମ୍ଭାବନା । ଆବଶ୍ୟକୀୟ ଜଳବାୟୁ ସାଙ୍ଗକୁ ଓଡ଼ିଶାରେ ରହିଛି ଯଥେଷ୍ଟ ଆଦ୍ରଭୁମି । ଯଦି ଗାଁ ଗାଁରେ ପୋଖରୀ ଗାଡ଼ିଆ ଓ ଜଳାଶୟ ଗୁଡିକରେ ଆପେ ଆପେ ପଦ୍ମଫୁଲ ଫୁଟି ଶୋଭା ବଢ଼ାଉଛି ତେବେ ଏହାର ଯତ୍ନ ନେଲେ ନିଶ୍ଚିତ ଚାଷୀ ମାଲେମାଲ ହେବେ ବୋଲି କହନ୍ତି ରାଜ୍ୟରେ ପଦ୍ମଫୁଲର ପ୍ରଥମ ଗବେଷିକା ଡ଼କ୍ଟର ଶଶିକଳା ବେଉରା ।
ଓଡିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟର ପ୍ରାକ୍ତନ ପ୍ରଫେସର ଡକ୍ଟର ଶଶିକଳା ବେଉରା ଓ ସହକାରୀ ପ୍ରଫେସର ଡ଼କ୍ଟର ଅଭିନାଶ ପଟ୍ଟନାୟକଙ୍କ ଦଶନ୍ଧି ବ୍ୟାପି ଗବେଷଣା କରି ସାମ୍ନାକୁ ଆଣିଛନ୍ତି ଅନେକ ଗୁରୁତ୍ୱପୂର୍ଣ୍ଣ ତଥ୍ୟ । ଫ୍ଲୋରିକଲଚର ଆଣ୍ଡ ଲାଣ୍ଡ ସ୍କେପିଙ୍ଗ ବିଭାଗୀୟ ମୁଖ୍ୟ ପଦରୁ ଅବସର ନେଇଥିବା ଶଶିକଳା ୨୦୦୨ରୁ ପଦ୍ମଫୁଲ ଉପରେ ଆରମ୍ଭ କରିଥିଲେ ଗବେଷଣା । କିନ୍ତୁ ଅଭିନାଶଙ୍କ ସହିତ ମିଶି ସେ ୨୦୧୪ରେ ଏଥିପାଇଁ ବିଶେଷ ସମୟ ଓ ଶ୍ରମ ଦେଇଥିଲେ । ୨୮ ଜିଲ୍ଲାରୁ ପଦ୍ମକନ୍ଦ ଓ ମଞ୍ଜି ସଂଗ୍ରହ କରି କୁଣ୍ଡ ଓ ଲ୍ୟାବରେ କରିଥିଲେ ଗବେଷଣା । ଜଣାପଡିଥିଲା ପଦ୍ମଫୁଲର ଅନେକ ଉପ ପ୍ରଜାତି ସାଙ୍ଗକୁ ରହିଛି ଭଲ ବ୍ୟବସାୟିକ ମୂଲ୍ୟ ।
ଆଧ୍ୟାତ୍ମିକତା ,ଶୁଦ୍ଧତା ,ଓ ସୌନ୍ଦର୍ଯ୍ୟର ପ୍ରତୀକ ହେଉଛି ପଦ୍ମଫୁଲ । ଏହା ଭାରତ ଓ ଭିଏତନାମର ଜାତୀୟ ଫୁଲ ଓ ଜାତୀୟ ପ୍ରତୀକ । ବିଗତ ଦେଢ଼ କୋଟିରୁ ଅଧିକ ବର୍ଷ ପୂର୍ବରୁ ରହିଛି ଏହାର ସତ୍ତା । ଜଳାଶୟ ,ହ୍ରଦ ,ପୋଖରୀର ପଙ୍କୁଆ ପାଣିରେ ବଢୁଥିବା ଏହି ପଦ୍ମର ରହିଛି ପ୍ରଚୁର ବ୍ୟବସାୟିକ ମୂଲ୍ୟ । ଗୋଲାପୀ ,ଧଳା ,ହାଲକା ହଳଦିଆ ରଙ୍ଗର ପଦ୍ମଫୁଲ ଉଭୟ ହିନ୍ଦୁ ଓ ବୌଦ୍ଧ ଧର୍ମରେ ବିଶେଷ ସ୍ଥାନ ନେଇଥାଏ । ଏହାର ମଞ୍ଜି ଓ ନାଡ଼କୁ ଖାଦ୍ୟ ଭାବେ ବ୍ୟବହାର କରାଯାଉଥିବା ବେଳେ ଆୟୁର୍ବେଦ ଓ ଚାଇନା ମେଡ଼ିସିନ ତିଆରିରେ ହୋଇଥାଏ ବ୍ୟବହାର । ବୌଦ୍ଧ ଧର୍ମରେ ଏହା ଜ୍ଞାନ ଓ ଶାନ୍ତିର ପ୍ରତୀକ ହୋଇଥିବା ବେଳେ ହିନ୍ଦୁ ଧର୍ମରେ ଭଗବାନ ବିଷ୍ଣୁ ଓ ଲକ୍ଷ୍ମୀଙ୍କ ପୂଜା ଅର୍ଚ୍ଚନାରେ ହୋଇଥାଏ ପ୍ରୟୋଜନ ।
ରାଜ୍ୟରେ ଗୋଟିଏ ପଦ୍ମଫୁଲର ଦାମ ୫ଟଙ୍କାରୁ ଆରମ୍ଭ ହୋଇ ୫୦ ଟଙ୍କା ଯାଏଁ ରହିଥାଏ । ରାଜ୍ୟରେ ପ୍ରତିଗାଁରେ ଏହାକୁ ବ୍ୟବସାୟିକ ଭାବେ ଚାଷ କରାଯାଇପାରିବ । ୨୮ ଜିଲ୍ଲାରୁ ପଦ୍ମକନ୍ଦ ଓ ମଞ୍ଜି ସଂଗ୍ରହ କରି ଉଦ୍ଭିଦ ବିଜ୍ଞାନୀ ଶଶିକଳା ଓ ଅଭିନାଶ ପ୍ରଥମେ ଓୟୁଏଟିରେ କୁଣ୍ଡ ଓ ଲ୍ୟାବରେ ରୋପଣ ସହିତ କରିଥିଲେ ତଦାରଖ । ଏହି ଗବେଷଣାରୁ ସାମ୍ନାକୁ ଆସିଥିଲା ଓଡ଼ିଶାରେ ପଦ୍ମଫୁଲର ବିବିଧତା । କେଉଁଠି ଏହା ଏକ ପାଖୁଡା ଯୁକ୍ତ ଥିବା ବେଳେ କେଉଁଠି ଦୁଇ ପାଖୁଡା ବିଶିଷ୍ଟ । କେଉଁଠି ଏହା ଲମ୍ବା ପାଖୁଡା ତ କେଉଁଠି ଏହା ବୃତ୍ତାକାର ଥିଲା । ଆଗରୁ ପଦ୍ମଫୁଲର ଖାଦ୍ୟମୂଲ୍ୟ ଉପରେ ଗବେଷଣା ହୋଇଥିବା ବେଳେ ଫୁଲ ଉପରେ ଏହା ରାଜ୍ୟର ପ୍ରଥମ ଗବେଷଣା । ଚାଷୀ ବଛା ବଛା ପ୍ରଜାତିର କନ୍ଦା ସଂଗ୍ରହ କରି ଘର ବାଡ଼ିରେ କୁଣ୍ଡ ଜରିଆରେ ବିକଶିତ କରି ବିକ୍ରି କରିପାରିବେ । ଏବେ ଭୁବନେଶ୍ୱର ,ପୁରୀ ଓ ଅନ୍ୟାନ୍ୟ ସହର ଗୁଡିକରେ ବର୍ଷ ତମାମ ପଦ୍ମଫୁଲର ଚାହିଦା ରହିଛି ।