କଟକ ଜିଲ୍ଲା ଆଠଗଡ଼ ବ୍ଲକ ରାଜନଗର ଗାଁରେ ଖୋଲିଛି ବେତ ବାଉଁଶ କାରିଗରୀ ଶିକ୍ଷାର ଭିନ୍ନ ଏକ ବିଦ୍ୟାଳୟ । ଏହି ବିଦ୍ୟାଳୟ ସାଧାରଣ ନୁହଁ । ଏଠାରେ ଅକ୍ଷର ଶିକ୍ଷା ବଦଳରେ ଦିଆଯାଏ ଜୀବିକାର ଶିକ୍ଷା । କାରିଗରୀ ଶିକ୍ଷା ଦେବା ପାଇଁ ଏଠାରେ ନିୟୋଜିତ ହୋଇଛନ୍ତି ଜଣେ ସରକାରୀ ଶିକ୍ଷୟତ୍ରୀ । ଶିକ୍ଷାର୍ଥୀ ପାଲଟିଛନ୍ତି ୧୪ ବର୍ଷରୁ ୪୦ ବର୍ଷର ଯୁବତୀ ଓ ଗୃହିଣୀ । ଏଠାରେ ହସ୍ତଶିଳ୍ପ ଜରିଆରେ ପ୍ରଦାନ କରାଯାଇଥାଏ ସ୍ୱାବଲମ୍ବୀର ମାର୍ଗ । ପ୍ରଶିକ୍ଷାର୍ଥୀ ମାନଙ୍କୁ ଶିଖିବା ବାବଦରେ କିଛି ଦେୟ ଦେବାକୁ ପଡ଼େନି । ଓଲଟା ସରକାରଙ୍କ ପକ୍ଷରୁ ପ୍ରତି ମାସରେ ଜଣ ପିଛା ଦୁଇହଜାର ଟଙ୍କାର ଷ୍ଟାଇପେଣ୍ଡ ପ୍ରଦାନ କରାଯାଏ । କଞ୍ଚାମାଲ ବାବଦକୁ ଜଣକ ପିଛା ୩୦୦ ଟଙ୍କାର ବ୍ୟୟ ସରକାର ବହନ କରନ୍ତି । ଏହି ବିଦ୍ୟାଳୟରେ ସମ୍ପ୍ରତି ୨୦ ଜଣ ପ୍ରଶିକ୍ଷାର୍ଥୀ ବେତ ଓ ବାଉଁଶରେ ତିଆରି କରୁଛନ୍ତି ଅନେକ ପ୍ରକାର ଘର ସଜ୍ଜା ଓ ବ୍ୟବହାର୍ଯ୍ୟ ସାମଗ୍ରୀ ।
ପ୍ରଶିକ୍ଷାର୍ଥୀ ମାନେ ନିର୍ଜୀଵ କାଠକୁ କରୁଛନ୍ତି ଜୀବନ୍ତ । କିଏ ବେତ ବାଉଁଶକୁ ଆବଶ୍ୟକୀୟ ମାପରେ କାଟି ମସୃଣ କରୁଛନ୍ତି ତ ଆଉ କିଏ ଯୋଡି ଯୋଡି ତିଆରି କରୁଛନ୍ତି ସରଞ୍ଜାମ । ଆକର୍ଷଣୀୟ ଲାଗିବା ପାଇଁ ଦିଆଯାଉଛି ରଙ୍ଗ । ପରସ୍ପରକୁ ସହଯୋଗ କରି ତିଆରି ହେଉଛି ଫୁଲଦାନୀ ,ଫୁଲଚାଙ୍ଗୁଡ଼ି ,ଫୁଲଗଛ ,ବୋଇତ ,ଦୋଳି ,ଟି ପୟ ,କର୍ଣ୍ଣର ସାଙ୍ଗକୁ ୱାଲହାଂଗିଙ୍ଗ । ଏସବୁ କାମ ଶିଖିବା ପାଇଁ ମିଳୁଛି ସରକାରୀ ଷ୍ଟାଇପେଣ୍ଡ ସହିତ ମାଗଣାରେ କଞ୍ଚାମାଲ । କଟକ ଜିଲ୍ଲା ବାଙ୍କୀର ଜାତ ମୁଣ୍ଡିଆ ଠାରେ ଏଭଳି ଏକ ବିଦ୍ୟାଳୟ ରହିଥିବା ବେଳେ ଆଠଗଡ଼ ରାଜନଗର ଗାଁରେ ରହିଛି ଜିଲ୍ଲାର ଶେଷ ତଥା ଦ୍ୱିତୀୟ ଜୀବିକା ଭିତ୍ତିକ ବିଦ୍ୟାଳୟ । ଘରେ ଥିବା ମହିଳା ଏସବୁ କାମ ଶିଖି ସ୍ୱରୋଜଗାରୀ ହେଉଥିବା ଜଣାଯାଇଛି ।