୪ ଏକର ଜମିରୁ ଚାରିଆଡୁ ଲାଭ ଉଠାଉଛନ୍ତି ଜଣେ ମହିଳା ଚାଷୀ । ଋତୁ କାଳୀନ ସ୍ୱଳ୍ପ ଅବଧିର ସୋରିଷ ,ଟମାଟୋ ,ଲଙ୍କା ,ଧନିଆ ଚାଷ ସହିତ ସେ ପାରମ୍ପରିକ ଧାନ ,ଗହମ ,ମୁଗ ଓ ହରଡ଼ ଚାଷ କରି ସ୍ୱାବଲମ୍ବୀ ହୋଇଛନ୍ତି ଝାରଖଣ୍ଡ ଚତରା ଜିଲ୍ଲାର ଏହି ପ୍ରଗତିଶୀଳ ମହିଳା ଚାଷୀ ମୁନୀୟା ଦେବୀ । ୪ ଏକର ଜମିରୁ ବାର୍ଷିକ ୫ ଲକ୍ଷ ରୋଜଗାର କରିବା ସହିତ ଭଲ ଚାଷୀ ଭାବେ ରାଜ୍ୟସ୍ତରରେ ପାଇଛନ୍ତି ସୁନାମ ଓ ସ୍ୱୀକୃତି ।
ଏବେ ଚାଷକୁ ନେଇ ଚାରିଆଡେ ହେଉଛି ନକରାତ୍ମକ ଆଲୋଚନା । ଚାଷ କଥା ଉଠିଲେ ଲୋକେ ଏହାକୁ ଲସ ଆଇଟମ ବୋଲି କହନ୍ତି । ଜୀବିକା ପାଇଁ ଚାଷକୁ ଭରସା କରିହେବନି ବୋଲି ପରବର୍ତ୍ତୀ ପିଢ଼ିକୁ ଚାଷ ବଦଳରେ ଚାକିରୀ ପାଇଁ ପ୍ରସ୍ତୁତି କରାଯାଉଛି । କିନ୍ତୁ ଆଧୁନିକ ଜ୍ଞାନ ସହିତ ଉନ୍ନତ କୌଶଳର ସମନ୍ୱୟରେ ଚାଷକୁ ମଧ୍ୟ ଲାଭଦାୟୀ କରିହେବ ବୋଲି ପ୍ରମାଣିତ କରିଛନ୍ତି ଝାରଖଂଡର ଗ୍ରାମୀଣ ମହିଳା ମୁନୀୟା । ମୁନୀୟା ପ୍ରଥମେ ଆତ୍ମା ସହିତ ଯୋଗାଯୋଗ କରି ତାଲିମ ,ପରିଦର୍ଶନ ଓ ବିହନ ସହାୟତା ପାଇବା ପରେ ଚାଷକୁ ଜୀବିକା ଭାବେ ଗ୍ରହଣ କରିଥିଲେ । କୃଷି ଉଦ୍ୟୋଗ ପରିଚାଳନା ସଂସ୍ଥା ଓ ଜାତୀୟ ଖାଦ୍ୟ ସୁରକ୍ଷା ମିଶନର ଲାଭ ଉଠାଇ ସେ ନିଜର ଭାଗ୍ୟ ବଦଳାଇବାରେ ସକ୍ଷମ ହୋଇଥିଲେ । ଝାରଖଣ୍ଡ ଚତରା ଜିଲ୍ଲା ପୋଟମ ଗାଁର ମୁନୀୟା ଦେବୀ ଜମି ହୁଡାରେ ବିରି ଓ ବାଦାମ ସହିତ ଜମିରେ ଟମାଟୋ ଉତ୍ପାଦନ କରି କୋଲକାତା ବଜାରକୁ ପଠାଇଥିଲେ । ଫେବୃଆରୀ ମାର୍ଚ୍ଚ ମାସରେ ଚାଷୀ କେଜି ପ୍ରତି ୧୦ ଟଙ୍କା ଦରରେ ଟମାଟୋ ବିକ୍ରି କରିଥିବା ବେଳେ ମୁନୀୟା ଦେବୀ ଜୁନ ଓ ଜୁଲାଇ ମାସରେ ଟମାଟୋ ଉତ୍ପାଦନ କରି କେଜି ପ୍ରତି ୩୦ ଟଙ୍କା ଦରରେ ବଜାରକୁ ଦେଇଥିଲେ ଓ ବେଶ ଦୁଇପଇସା ଆୟ କରିଥିଲେ । ଏବେ ମୁନୀୟା ସମ୍ପୂର୍ଣ୍ଣ ଜୈବିକ ପଦ୍ଧତିରେ ୪ ଏକର ଜମିରେ ବାସ୍ନା ଧାନ ଚାଷ କରିଛନ୍ତି । ଜୈବିକ ଧାନ ଓ ପରିବାର ଦାମ ଅଧିକ ଥିବାରୁ ସେ ବ୍ୟବସାୟିକ ଢଙ୍ଗରେ ଏହାର ପରିଚାଳନା କରି ସଫଳ ହୋଇଛନ୍ତି ।