ଆଜିକାଲି ବିବାହ ଏକ ବ୍ୟୟ ବହୁଳ ଉତ୍ସବରେ ପରିଣତ ହେବାକୁ ବସିଛି । କିଏ ଆକାଶରେ ବିବାହ ଆୟୋଜନ କରୁଛି ତ କିଏ ଗଭୀର ଜଳରେ ପାଳୁଛି ବିବାହ ମୁହୂର୍ତ୍ତ । ଡେଷ୍ଟିନେସନ ୱେଡ଼ିଙ୍ଗ ଓ ଅତିଥି ଚର୍ଚ୍ଚାରେ କରାଯାଉଛି ହାତଖୋଲା ଖର୍ଚ୍ଚ । ଯିଏ ଯେମିତି ଦେଖିଲା ପ୍ରତିଦ୍ବନ୍ଦିତା ମନୋଭାବ ନେଇ ସେମିତି ଆଡମ୍ବର ପୂର୍ଣ୍ଣ ଭାବରେ ଆୟୋଜିତ କଲା ବିବାହ କାର୍ଯ୍ୟକ୍ରମ । ହଳଦୀ ,ମେହେନ୍ଦି ,ସଂଗୀତ ଆଦି ପ୍ରି ୱେଡ଼ିଙ୍ଗ କାର୍ଯ୍ୟକ୍ରମରେ ଖର୍ଚ୍ଚ ପାଇଁ ଋଣର ବୋଝ ମୁଣ୍ଡାଇବାକୁ ବି ଅନେକ ପ୍ରସ୍ତୁତ । ଆମେରିକାରେ ବିବାହ ଏବେ ସାଧାରଣ ପରିବାର ଗୁଡିକ ପାଇଁ ବୋଝ ପାଲଟିଛି । କେବଳ କେକ୍ କାଟିବା ସେବାର ମୂଲ୍ୟ ୬୫୦ ଡଲାର (ପ୍ରାୟ ୫୪ ହଜାର ଟଙ୍କା) ପର୍ଯ୍ୟନ୍ତ ରହିଛି। ଏସବୁ ଭିତରେ ଆସିଛି ଏକ ରୋଚକ ଖବର । ଆମେରିକାର ଇଡାହୋ ରାଜ୍ୟର ଇଗଲ ସହରରେ ଦୁଇ ଉଦ୍ୟୋଗପତି ମାର୍ଲି ଜ୍ୟାକ୍ସ (୩୪) ଓ ଷ୍ଟିଭ୍ ଜେ ଲାର୍ସନ (୩୭) ନିଜ ବିବାହ ବୋଝକୁ ଉପଶମ କରିବା ସହିତ ଭିନ୍ନ ଭାବେ ପାଳନ ପାଇଁ ଯୋଜନା କରିଥିଲେ ।
ସେମାନଙ୍କ ବିବାହ ଉତ୍ସବରେ ଯୋଗଦେବାକୁ ଥିବା ଅତିଥିମାନେ ସେମାନଙ୍କୁ ଉପହାର ଦେବା ବଦଳରେ କେବଳ ନିଜ ନିଜ ଖାଦ୍ୟର ଖର୍ଚ୍ଚ ବହନ କରନ୍ତୁ ବୋଲି ସେମାନେ ଚାହିଁଥିଲେ । ତେଣୁ ତାଙ୍କ ବିବାହରେ ଯୋଗଦେବା ପାଇଁ ଏହି ଦମ୍ପତି ଅତିଥିମାନଙ୍କୁ ଟିକେଟ୍ କିଣିବାକୁ ଆହ୍ବାନ କରିଥିଲେ। ଟିକେଟ ଦୁଇ ପ୍ରକାର ର ଥିଲା । ପ୍ରଥମ ପ୍ରକାରର ଟିକେଟ ଦାମ ୫୭ ଡଲାର (ପ୍ରାୟ ୪,୭୫୦ ଟଙ୍କା) ଥିଲା ,ଯାହା ସାହାଯ୍ୟରେ ଜଣେ ଅତିଥିଙ୍କୁ ବିବାହ ସମାରୋହ ଏବଂ ଭୋଜି ପାଇଁ ପ୍ରବେଶର ଅନୁମତି ମିଳିଥିଲା । ଦ୍ବିତୀୟ ପ୍ରକାରର ଟିକେଟ ଦାମ ଥିଲା ୯୯୭ ଡଲାର (ପ୍ରାୟ ୮୩,୦୦୦ ଟଙ୍କା) ଯାହା ସାହାଯ୍ୟରେ ୨ ଜଣ ଅତିଥିଙ୍କୁ ବିବାହ ଭୋଜି ସମେତ ବିଭିନ୍ନ ପ୍ରି ଏବଂ ପୋଷ୍ଟ ୱେଡ଼ିଂ କାର୍ଯ୍ୟକ୍ରମଗୁଡିକରେ ପ୍ରବେଶର ଅନୁମତି ମିଳିଥିଲା । ମାର୍ଲି ଏବଂ ଷ୍ଟିଭ୍ କହିଛନ୍ତି, ସେମାନେ ଏପରି ବିବାହ ଲାଭ ପାଇବା ପାଇଁ କରିନାହାନ୍ତି। ବିବାହ ଖର୍ଚ୍ଚ ବ୍ୟତୀତ ତାଙ୍କୁ ମିଳିଥିବା ଅତିରିକ୍ତ ୯୬, ୨୦୦ ଡଲାର (ପ୍ରାୟ ୮୫ ଲକ୍ଷ ଟଙ୍କା)କୁ ସେମାନେ କେନିଆରେ ଶିକ୍ଷା ଭିତ୍ତିଭୂମି କ୍ଷେତ୍ରରେ କାର୍ଯ୍ୟ କରୁଥିବା ଭିଲେଜ୍ ଇମ୍ପାକ୍ଟ ନାମକ ଏକ ଅଣଲାଭକାରୀ ସଂସ୍ଥାକୁ ଦାନ କରିଛନ୍ତି । ବିବାହ କାର୍ଯ୍ୟକ୍ରମକୁ ଇଭେଣ୍ଟରେ ପରିଣତ କରି ଅର୍ଥ ରୋଜଗାର ଓ ମିଳିଥିବା ଅର୍ଥରୁ ସମାଜସେବା କରି ଏହି ଦମ୍ପତ୍ତି ନୂଆ ଉଦାହରଣ ସୃଷ୍ଟି କରିଛନ୍ତି ।