ସ୍ୱୟଂ ସହାୟକ ଦଳ ଜରିଆରେ ମହିଳା ସଶକ୍ତିକରଣ ପ୍ରକ୍ରିୟାକୁ ମିଳିଛି ବଳ । ଦଳଗତ ଋଣକୁ ବ୍ୟବହାର କରି ଶହ ଶହ ମହିଳା ନିଜର ଆର୍ଥିକ ସ୍ଥିତିରେ ଆଣିଛନ୍ତି ପରିବର୍ତ୍ତନ । ଆୟକାରୀ ପଦକ୍ଷେପ ଜରିଆରେ ଆଗକୁ ବଢୁଥିବା ମହିଳା ମାନଙ୍କ ମଧ୍ୟରୁ ଲକ୍ଷପତି ଦିଦି ସୃଷ୍ଟି ଦିଗରେ ରାଜ୍ୟ ଓ କେନ୍ଦ୍ର ସରକାର ସହାୟତା ଯୋଗାଇ ଆସୁଛନ୍ତି । ମୋହନ ମାଝୀଙ୍କ ସରକାର କ୍ଷମତାକୁ ଆସିବା ପରେ ଏହି ପ୍ରକ୍ରିୟାକୁ ତ୍ୱରାନ୍ୱିତ କରିବା ପାଇଁ ସୁଭଦ୍ରା ଯୋଜନାରେ କୋଟିଏରୁ ଅଧିକ ମହିଳାଙ୍କୁ ବର୍ଷକୁ ୧୦ ହଜାର କରି ପାଞ୍ଚବର୍ଷ ମଧ୍ୟରେ ୫୦ ହଜାର ଟଙ୍କା ପ୍ରଦାନ କରାଯାଇଛି । ସୋମବାର ଲୋକସେବା ଭବନ ମହିଳା ଓ ଶିଶୁ ବିକାଶ ସମ୍ମିଳନୀ କକ୍ଷରେ ଭିଡିଓ କନଫେରେନ୍ସିଙ୍ଗ ମାଧ୍ୟମରେ ସୁଭଦ୍ରା ଭଉଣୀମାନଙ୍କ ସହ ସିଧାସଳଖ ଆଲୋଚନା କରାଯାଇଥିଲା । ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା ନିଜେ ଉପସ୍ଥିତ ରହି ହିତାଧିକାରୀଙ୍କ ଅଭିଜ୍ଞତା ପଚାରି ବୁଝିଥିଲେ ।
ସୁଭଦ୍ରା ଯୋଜନା ବାବଦକୁ ମିଳିଥିବା ସହାୟତା ରାଶିର ଉପଯୋଗ କିଭଳି କରିଛନ୍ତି ସେ ବିଷୟରେ ଉପ ମୁଖ୍ୟମନ୍ତ୍ରୀ ପ୍ରଭାତୀ ପରିଡା ପଚାରି ବୁଝିଥିଲେ । ବର୍ତ୍ତମାନ ଜାରି ରହିଥିବା ସମୀକ୍ଷା ଓ ସେଥିରୁ ମିଳୁଥିବା ତଥ୍ୟ ଆଧାରରେ ଆଗାମୀ ଦିନରେ ସୁଭଦ୍ରା ଭଉଣୀମାନଙ୍କ ପାଇଁ ଯୋଜନା ପ୍ରସ୍ତୁତ କରାଯିବ ବୋଲି ସେ ସୂଚିତ କରାଇଥିଲେ । ଆଗାମୀ ଦିନରେ ରାଜ୍ୟ ସରକାର ଲକ୍ଷପତି ଦିଦି ମାନଙ୍କୁ କୋଟିପତି ଦିଦି ଭାବେ ପରିଗଣତି କରିବା ପାଇଁ ସ୍ୱୟଂ ସହାୟକ ଦଳ ଜରିଆରେ ବିନା ସୁଧରେ ୧୦ ଲକ୍ଷ ଟଙ୍କା ଋଣ ପ୍ରଦାନ କରାଯିବ ବୋଲି ଉପ ମୁଖ୍ୟମନ୍ତ୍ରୀ ଦର୍ଶାଇଥିଲେ । ଓଡ଼ିଶାର ବିଭିନ୍ନ ଜିଲ୍ଲାର ସୁଭଦ୍ରା ହିତାଧିକାରୀ ଯୋଜନାରୁ ମିଳିଥିବା ସହାୟତା ରାଶିକୁ କିଭଳି କାମରେ ଲଗାଇ ପରିମାଣ ବଢ଼ାଇଛନ୍ତି ଆଲୋଚନା କରିଥିଲେ । ସୁଭଦ୍ରା ଭଉଣୀ ମାନେ ସେମାନଙ୍କର ସଫଳତାର କାହାଣୀ ଲେଖି ବିଭାଗକୁ ପଠାନ୍ତୁ ଓ ସେଗୁଡିକ ସଚେତନତା ପାଇଁ ବ୍ୟବହାର କରାଯିବ ବୋଲି ଉପ ମୁଖ୍ୟମନ୍ତ୍ରୀ ପ୍ରଭାତୀ ପରିଡା ଅବଗତ କରାଇଛନ୍ତି ।