ବୟସ ହୋଇଗଲେ ସୀମିତ ହୋଇଯାଏ ପୃଥିବୀ । ଶରୀର ଠିକ ଥିଲେ ବି ସବୁଠି ମିଳେନି କାମ । ଏଭଳି ସ୍ଥିତିରେ ଅନେକ ଲୋଡିଥାନ୍ତି ବିଶ୍ରାମ । କିନ୍ତୁ ମହାରଷ୍ଟ୍ରର ସତାରା ଜିଲ୍ଲାରେ ଜଣେ ୬୫ ବର୍ଷର ମହିଳା ଅଟୋ ଚାଳକ ବୃତ୍ତିରେ ନିଜକୁ ନିୟୋଜିତ କରି କରୁଛନ୍ତି ଦୈନିକ ୫୦୦ ରୁ ୭୦୦ ଟଙ୍କାର ଆୟ । ଏହି ବୟସ୍କା ମହିଳା ଜଣଙ୍କ ହେଉଛନ୍ତି ମଙ୍ଗଳା ଆୱାଲେ । ମଙ୍ଗଳା ବୟସକୁ କେବଳ ଏକ ସଂଖ୍ୟା ଭାବେ ପ୍ରମାଣିତ କରିଛନ୍ତି । ମଙ୍ଗଳାଙ୍କ ସ୍ୱାମୀ ଅନେକ ବର୍ଷ ପୂର୍ବରୁ ଆଖି ବୁଝିଛନ୍ତି । କୁଲି ମଜୁରୀ କରି ସେ ନିଜର ତିନିଝିଅ ଓ ପୁଅକୁ ବଡ଼ କରିଛନ୍ତି । ମଙ୍ଗଳାଙ୍କ ତିନି ଝିଅ ବାହା ହୋଇ ଶାଶୁ ଘରକୁ ଚାଲିଗଲେଣି । ଏକମାତ୍ର ପୁଅ ମହାରଷ୍ଟ୍ର ରାଜ୍ୟ ସରକାରଙ୍କ ପରିବହନ ବିଭାଗରେ ଡ୍ରାଇଭର ଭାବେ କାମ କରନ୍ତି । ବର୍ଷ ପରେ ବର୍ଷ ଧରି ପରିବାର ପାଇଁ କଠିନ ସଂଘର୍ଷ କରି ଆସିଥିବା ମଙ୍ଗଳା ପରିଣତ ବୟସରେ ମଧ୍ୟ ବିଶ୍ରାମ ନନେଇ ଜାରି ରଖିଛନ୍ତି ସଂଘର୍ଷ । ସକାଳ ୯ରୁ ସେ ନିଜ ଅଟୋ ସହିତ ସଡକ ଉପରକୁ ଆସନ୍ତି । ନୂଆ ନୂଆ ସହରର ମଦୁଆ ,ନିଶାଖୋର ଓ ଅସାମାଜିକ ଲୋକଙ୍କୁ ଡର ଲାଗୁଥିଲା ଏବେ ଆଉ ଡର ନାହିଁ । ଦାଦି ମା ଡ୍ରାଇଭର ନାଁରେ ଛୋଟ ଏହି ସହରରେ ତାଙ୍କର ଏକ ନୂଆ ପରିଚୟ ହୋଇଛି ବୋଲି କହନ୍ତି ମଙ୍ଗଳା । ଦିନକୁ ୫୦୦ ରୁ ୭୦୦ ଟଙ୍କାର ରୋଜଗାର ହେଉଥିବାରୁ ନିଜ ଖର୍ଚ୍ଚ ଉଠିଯାଉଛି । କାହା ଉପରେ ବୋଝ ହେଉନି ବୋଲି ନିଜର ଆତ୍ମବିଶ୍ୱାସ ବଢିଛି । ଅଟୋରେ ସବାର ହୋଇଥିବା ଜଣେ ମହିଳା ଯାତ୍ରୀ କହନ୍ତି ଏକାକୀ ଅଟୋରେ ଯିବା ବେଳେ ଯେଉଁ ଦର ମନରେ ରହୁଥିଲା ଦାଦି ମା ଅଟୋରେ ବସିଲେ ସେ ଡର ଆଉ ରହେନି । ମହିଳା ଯାତ୍ରୀଙ୍କ ପସନ୍ଦର ଅଟୋ ପାଲଟିଛି ମଙ୍ଗଳା ଦାଦିଙ୍କ ଅଟୋ । ମଙ୍ଗଳା କେବଳ ବୟସ୍କ ଲୋକଙ୍କ ପାଇଁ ପ୍ରେରଣା ନୁହଁ ବରଂ କାମ ପ୍ରତି ବିମୁଖ ଯୁବ ବର୍ଗଙ୍କ ପାଇଁ ଅନନ୍ୟ ଉଦାହରଣ ମଧ୍ୟ ।