ଉତ୍ତରପ୍ରଦେଶର ଲଖନଉର ବାସିନ୍ଦା ବୀଣା ଆନନ୍ଦ ବୃତ୍ତିରେ ଜଣେ ଶିକ୍ଷୟତ୍ରୀ । କିନ୍ତୁ ବ୍ରତ ତାଙ୍କର ସମାଜସେବା । ଶୋଷିତ ମହିଳା ମାନଙ୍କୁ ସ୍ୱାବଲମ୍ବୀ ଓ ସଶକ୍ତ କରିବା ପାଇଁ ସେ ଗଢ଼ିଛନ୍ତି ଦିଦି' ନାମରେ ନିଆରା ଏକ ସଂଗଠନ । ବିଭିନ୍ନ କାରଣରୁ ଦୁର୍ଦଶା ଭୋଗୁଥିବା ମହିଳା ମାନଙ୍କୁ ଦିଦି ପରାମର୍ଶ ,ଦକ୍ଷତା ବୃଦ୍ଧି ଓ ରୋଜଗାର କରିବାର ସୁଯୋଗ ଦେଇଥାଏ । ଘରୋଇ ହିଂସା ଏପରି ଏକ ରୋଗ ଯାହା ବର୍ଷ ବର୍ଷ ଧରି ରହିଆସିଛି । ଶିକ୍ଷା ଓ ସଚେତନତା ବୃଦ୍ଧି ସତ୍ୱେ ମହିଳାମାନେ ଅଧିକରୁ ଅଧିକ ଉତ୍ପୀଡ଼ନର ଶିକାର ହେଉଥିବା ବୀଣା କହନ୍ତି । ଭାରତୀୟ ଘର ଗୁଡିକରେ ୧୮ରୁ ୪୯ ବର୍ଷର ୨୯.୩ ପ୍ରତିଶତ ବିବାହିତା ମହିଳା ଘରୋଇ ହିଂସା ଓ ଯୌନ ହିଂସାର ସାମ୍ନା କରିଥାନ୍ତି । ସେହିପରି ୧୮ବର୍ଷରୁ ୪୯ ବର୍ଷ ବୟସ ବର୍ଗର ମହିଳା ମାନଙ୍କ ମଧ୍ୟରୁ ୩.୧ ପ୍ରତିଶତ ଗର୍ଭବତୀ ମହିଳା ସେମାନଙ୍କର ଗର୍ଭାବସ୍ଥା ସମୟରେ ଶାରୀରିକ ହିଂସାର ସାମ୍ନା କରିଥାନ୍ତି । ଏଭଳି ପୀଡ଼ିତାଙ୍କୁ ସମାଜରେ ସମ୍ମାନ ଓ ନୂଆ ପରିଚିତି ଦେବା ପାଇଁ ଦିଦିଜ ନାମରେ ସାମାଜିକ ଅନୁଷ୍ଠାନ ଗଢ଼ିଥିଲେ ବୀଣା ।
୨୦୧୩ ରେ ଗଠିତ ଏହି ଅନୁଷ୍ଠାନ ପ୍ରଥମେ ସିଷ୍ଟର୍ସ ଇନ ସଲିଡାରିଟି ନାମକ ଏକ ବଡ଼ ସାମାଜିକ ସଂଗଠନର ସହାୟତାରେ ଆରମ୍ଭ ହୋଇଥିଲା । ଏହି ସଂଗଠନର ପ୍ରତ୍ୟେକ ସଦସ୍ୟ ଦିଦି ସଂଗଠନ ପାଇଁ ୫ହଜାର ଟଙ୍କା ଲେଖାଏଁ ସହଯୋଗ କରିଥିଲେ । ସେହି ଅର୍ଥରେ ରୋଷେଇ ସାମାନ କିଣାଯାଇଥିଲା ଓ ଯୁବତୀ ମାନଙ୍କୁ ରୋଷେଇ କୌଶଳ ବାବଦରେ ପ୍ରଶିକ୍ଷଣ ପ୍ରଦାନ କରାଯାଇଥିଲା। ଆଜିର ତାରିଖରେ ଦିଦି ପକ୍ଷରୁ ଏକ କ୍ୟାଣ୍ଟିନ ପରିଚାଳନା କରାଯିବା ସହିତ କର୍ପୋରେଟ ହାଉସ ଗୁଡିକୁ କ୍ୟାଟରିଂ ସେବା ପ୍ରଦାନ କରାଯାଉଛି । ଦିଦି ସହିତ ଯୋଡି ହୋଇଥିବା ମହିଳା ମାନେ ଆଚାର ,ଲଡୁ ,ପାମ୍ପଡ଼ ,ବଡି,ସିଲାଇ ,ବୁଣାବୁଣି ,ଅଳଙ୍କାର ତିଆରି ,ରାକ୍ଷୀ ତିଆରି ଓ ମହମବତୀ ଓ ଦୀପ ତିଆରି ଭଳି ଅନେକ ପ୍ରକାର କାମ କରି ରୋଜଗାରକ୍ଷମ ହୋଇପାରିଛନ୍ତି । ଏଥିରେ ସାମିଲ ପ୍ରତ୍ୟେକ ମହିଳା ମାସିକ ୨୦ ହଜାର ଟଙ୍କାର ରୋଜଗାର ଦିଗରେ ସକ୍ଷମ ହୋଇଛନ୍ତି । କିଛି ବର୍ଷ କାମ କରିବା ଭିତରେ ଅନେକ ମହିଳା ନିଜର ପୁଞ୍ଜି ତିଆରି କରି ଆର୍ଥିକ ସ୍ୱାବଲମ୍ବୀ ହେବାର ସୁଯୋଗ ପାଇଛନ୍ତି ।