ମହାରାଷ୍ଟ୍ରର ଭାଗ୍ୟଶ୍ରୀ ପାଠକ ୟୁଟ୍ୟୁବରେ ଏବେ ଏକ ଚର୍ଚ୍ଚିତ ଚେହେରା । ତେବେ ନୃତ୍ୟ ନୁହଁ କି ସଂଗୀତ ନୁହଁ । କିମ୍ବା କମେଡି ନୁହଁ କି ଆକ୍ସନ ନୁହଁ । କିନ୍ତୁ ସୋସିଆଲ ମିଡିଆରେ ଅପଲୋଡ଼ ହେଉଥିବା ତାଙ୍କର ଭିଡିଓ ଯୁବବର୍ଗଙ୍କୁ ମାର୍ଗଦର୍ଶନ କରାଉଛି । ଭାଗ୍ୟଶ୍ରୀ ନିଜ ୟୁଟ୍ୟୁବ ଚାନେଲ ର ନାଁ ଦେଇଛନ୍ତି ମାର୍କେଟ ଆନି ମି । ଏଥିରେ ସେ ୨୦୨୧ ଠାରୁ ଅଦ୍ୟାବଧି ୧୦୦ ଭିଡିଓ ଅପଲୋଡ଼ କରିଛନ୍ତି । ପ୍ରତ୍ୟେକ ଭିଡିଓରେ ସେ କେଉଁଠି ନିବେଶ କରିବେ ? ଦୀର୍ଘ ସୂତ୍ରୀ ନିବେଶ କରିବେ କି ସ୍ୱଳ୍ପ ସୂତ୍ରୀ କରିବେ ? କେଉଁଥିରେ କେତେ ପୁଞ୍ଜି ଖଟାଇବେ ଓ କିପରି ଆଦି ବିଷୟ ଉପରେ ବିସ୍ତୃତ ଆଲୋଚନା କରିଥାନ୍ତି । ଭାଗ୍ୟଶ୍ରୀ ଙ୍କ ବୟସ ୬୪ କିନ୍ତୁ ତାଙ୍କର ପରାମର୍ଶ ବର୍ତ୍ତମାନ ସମୟ ପାଇଁ ଅତ୍ୟନ୍ତ ପ୍ରାସଙ୍ଗିକ ଥିବାରୁ କେବଳ ୟୁଟ୍ୟୁବରେ ତାଙ୍କର ଅଛନ୍ତି ୬୯ ହଜାର ଅନୁସରଣକାରୀ । ୟୁଟ୍ୟୁବ ସମେତ ଇନଷ୍ଟାଗ୍ରାମ ଓ ଟେଲିଗ୍ରାମ ଜରିଆରେ ସେ ନିଜର ଭିଡିଓ ଦର୍ଶକଙ୍କ ନିକଟରେ ପହଞ୍ଚାନ୍ତି ଓ ଅଧିକ ଦର୍ଶକ ଦେଖିଲେ ୟୁଟ୍ୟୁବ ଓ ଫେସବୁକରୁ ନିର୍ଦ୍ଧିଷ୍ଟ ପରିମାଣର ଅର୍ଥ ରୋଜଗାର କରନ୍ତି ।
ଭାଗ୍ୟଶ୍ରୀ ଅନ୍ୟ ମହିଳାଙ୍କ ପରି ସାଧାରଣ ଜୀବନ ଜିଉଁଥିଲେ । ବିବାହ ପରେ ପରିବାରର ଦାୟିତ୍ୱ ଓ ପରେ ପିଲାମାନଙ୍କ ଯତ୍ନ ମଧ୍ୟରେ ସେ ନିଜର କ୍ୟାରିୟର ଓ ସ୍ବପ୍ନ ଠାରୁ ସାମୟିକ ଭାବେ ଦୁରେଇ ଯାଇଥିଲେ । ପିଲାମାନେ ବଡ଼ ହୋଇ ନିଜେ ନିଜର କାମ କରିବାକୁ ସମର୍ଥ ହେବା ପରେ ଭାଗ୍ୟଶ୍ରୀ ଘରୁ ପାଦ କାଢ଼ିଲେ । ସାକ୍ଷାତକାର ଦେଇ ଗୋଟିଏ ଚାକିରୀ ମଧ୍ୟ ପାଇଲେ । କିନ୍ତୁ ୨୦ ବର୍ଷ ତଳେ ପଢିଥିବା ପାଠ ଓ ବର୍ତ୍ତମାନର ଅଫିସ କାମ ଭିତରେ ସେ ନିଜକୁ ଅସହଜ ମନେକଲେ ଓ ଚାକିରୀ ଛାଡ଼ି ଟ୍ରେଡିଂ ଦୁନିଆ ଆଡକୁ ଆକର୍ଷିତ ହେଲେ । କିଛି ଦିନର ନିରୀକ୍ଷଣ ଓ ବଜାର ସୂଚନା ବାବଦରେ ପରିଚିତ ହେବା ପରେ ସେ ନିବେଶ ବାବଦରେ ପରାମର୍ଶ ଦେବାର ନିଷ୍ପତ୍ତି ନେଲେ । ଆଜି ସେ ଜଣେ ସଫଳ ନିବେଶ ବିଶେଷଜ୍ଞ । ହଜାର ହଜାର ଲୋକେ ତାଙ୍କର ବକ୍ତୃତା ଶୁଣି ନିବେଶ ପାଇଁ ଉତ୍ସାହିତ ହୋଇଥାନ୍ତି ।