ଗାଜିଆବାଦର ପଟେଲ ନଗରର ବାସିନ୍ଦା ପୁନମ ଦେବୀଙ୍କ ମୁଣ୍ଡ ଉପରେ ଛିଡି ପଡିଛି ଆକାଶ । ୨୦୧୯ କରୋନା ସମୟରେ ଅଚାନକ ତାଙ୍କ ସ୍ୱାମୀ ରାଜେଶଙ୍କୁ ପକ୍ଷାଘାତ ହେଲା । ରାଜେଶଙ୍କ ଏକ ବାଇକ ମରାମତି ଦୋକାନ ଥିଲା । ଛୋଟ ଏକ କାଠ କ୍ୟାବିନରେ ବାଇକ ମରାମତି ଉପକରଣ ରଖି ସେ ନିଜର ପରିବାର ପୋଶୁଥିଲେ । ପକ୍ଷାଘାତରେ ତାଙ୍କ ବାମ ହାତ ଅଚଳ ହୋଇଯିବା ପରେ ସେ ଆଉ ବାଇକ ମରାମତି କରିପାରିଲେ ନାହିଁ । ମହାମାରୀ ସହିତ ଜୀବିକାକୁ ନେଇ ଚାଲିଲା ତାଙ୍କର ସଂଘର୍ଷ । ଏଭଳି ସମୟରେ ଘରୁ ପାଦ କାଢ଼ିଲେ ପୁନମ । ଗ୍ୟାରେଜ ଖୋଲିଲେ ଓ ସ୍ୱାମୀଙ୍କୁ ପାଖରେ ବସାଇ ଆରମ୍ଭ କଲେ ବାଇକ ମରାମତି କାମ । ୨୦୨୦ ଡିସେମ୍ବର ଠାରୁ ସେ ନିଜେ ମରାମତି କରିବାରେ ସକ୍ଷମ ହେଲେ ।
ଗାଜିଆବାଦର ପ୍ରଥମ ମହିଳା ବାଇକ ମିସ୍ତ୍ରୀ ଭାବେ ତିଆରି ହେଲା ତାଙ୍କର ନୂଆ ପରିଚୟ । ପୁରୁଷ ପ୍ରାଧାନ୍ୟ ବୃତ୍ତିରେ ରହିଥିବାରୁ ଶୁଣିବାକୁ ମିଳୁଥିଲା ଥଟ୍ଟା ପରିହାସ । ସ୍ୱାମୀଙ୍କ ପକ୍ଷାଘାତ ଚିକିତ୍ସା ,ପିଲାମାନଙ୍କ ପଢ଼ିବାର ଖର୍ଚ୍ଚ ଓ ଦୈନଦିନ ଖାଦ୍ୟ ଓ ଅନ୍ୟାନ୍ୟ ଆବଶ୍ୟକତା ପାଇଁ ସେ ଗ୍ୟାରେଜ କାମରୁ ଓହରିଲେ ନାହିଁ । ରୋଜଗାର ଠିକ ହୋଇଆସୁଥିବା ବେଳେ ଡିସେମ୍ବର ୧୯,୨୦୨୩ ରେ ତାଙ୍କ କ୍ୟାବିନ ଗ୍ୟାରେଜରେ କେହି ନିଆଁ ଲଗାଇଦେଇଛି । ଏଥିରେ ସମୁଦାୟ ୨୦ ହଜାର ଟଙ୍କାର ଆସବାବ ପତ୍ର ଗାଏବ ସହିତ ଲକ୍ଷାଧିକ ଟଙ୍କାର କ୍ୟାବିନ ପୋଡି ପାଉଁଶ ହୋଇଯାଇଛି । ପାଉଁଶ ତଳୁ କାଳେ କିଛି ସାମଗ୍ରୀ ସୁରକ୍ଷିତ ରହିଯାଇଥିବ ଖୋଜୁଛନ୍ତି ପୁନମ । ନିଜ ଭାତହାଣ୍ଡି ନଷ୍ଟ ହୋଇଯାଇଥିବା ସତ୍ୱେ ପୁନମ ପୋଲିସରେ ରିପୋର୍ଟ ଲେଖିବା ସହିତ ପରିବାର ମୁହଁରେ ଅନ୍ନ ମୁଠାଏ ଦେବା ପାଇଁ ପୁଣି ନିଜ ଅଂଟା ସଳଖୁଛନ୍ତି ।
ଅଧିକ ପଢ଼ନ୍ତୁ: ସୁଶୀଳାଙ୍କ ମଥାରେ ଛିଡ଼ିପଡ଼ିଛି ଆକାଶ